Babizelwe koshubile abaqeqeshi boSuthu
Abaphathi bafuna ukubona izithelo ezinhle
BABIZELWE emhlanganweni ophuthumayo abaqeqeshi bamaZulu FC ngombozo odlalwe yile kilabhu kwiKwaZulu-Natal Premier’s Cup ebingempelasonto eMhlathuze Sport Complex, eRichards Bay.
USuthu lushaqise abaningi ludlala ibhola elisezingeni eliphansi kakhulu luphuma ekuseni kulo mqhudelwano onqotshwe yiRoyal Eagles iguqisa iLamontville Golden Arrows kowamanqamu.
Umphuphe webhola lale kilabhu ukhalise nomgadli wayo osemnkantshubomvu ebholeni elikhokhelayo, uSiyabonga “Bhele” Nomvethe.
Lo mgadli uzwakalise ukuthi kumele bazinuke amakhwapha, bajike izinto ngokushesha ukuqinisekisa ukuthi bayazinza kwi-Absa Premiership abangene ngewindi kuyona bethenga igunya leThanda Royal Zulu lokudlala kulesi sigaba.
ILANGA lithole ukuthi abaqeqeshi boSuthu babizelwe emhlanganweni ophuthumayo ngoMsombuluko beyonikwa isibhaxu somlomo kwazise izikhulu kazeneme ngezikubone kwiPremier’s Cup. Kuthiwa bathembise ukwenza kangcono kwiPrince Mangosuthu Legacy Cup engempelasonto oLundi Regional Stadium, oNdini.
Ukuqhathwa kwamakilabhu azogadulisana kulo mqhudelwano kuzokwenziwa kusasa ngoLwesihlanu oNdini kanti kulindeleke ukuba kuhanjelwe nguMntwana uMango- suthu Buthelezi ohlonishwa wuSuthu ngale midlalo kwazise ungumshana weSilo uSolomon esasungula AmaZulu FC ngowe1932.
Amakilabhu azobamba iqhaza kulo mqhudelwano okuwunyaka wokuqala udlalelwa wuSuthu, yiBloemfontein Celtic, yiMbabane Swallows yaseSwaziland nesikwati saseZululand.
La makilabhu azogadulisana emidlalweni ezokuba ngeSonto kusuka ngo-09h00 njengoba owamanqamu uzoqala ngo-15h00. NgoMgqibelo kuzokuba nedili lomculo elihlelwa nguDj Tira.
Izindaba zokubizelwa emhlanganweni kwethimba labaqeqeshi boSuthu ziqinisekiswe kuleli phephandaba nguQedusizi “Qedi” Dlamini oyiMenenja yale kilabhu.
“Abaphathi kabeneme ngebhola elidlalwe yikilabhu ngeledlule. Abaqeqeshi bazisiwe ngalokho futhi bathembisile ukwenza kahle kulo mqhudelwano ukuhlonipha uShenge.
"Sizojima enkundleni yasoNdini ngoLwesihlanu (kusasa) ngo-14h00 kanti abalandeli bavumelekile ukuzosibuka,” kusho uDlamini.
Uthi bazocijela ukuqala kwesizini ye-Absa Premiership ngokubhekana neRichards Bay FC ngoLwesine oluzayo bese ngoMgqibelo mhla ziyisihlanu kuNcwaba begijima kwiNkandla Mayoral Cup.
Uthi le kilabhu kayikaqedi ukusayinisa njengoba isadinga umdlali wasemuva kwesobunxele, owasesiswini nomgadli ovuth’ uphondo.