BAFUNA UKUBUYISA ISITHUNZI SE-PIRATES
BAFUNA ukubuyisa isithunzi seOrlando Pirates abadlali bale kilabhu ephoxile ngesizini edlule ihluleka ukungena kwi- top 8.
IPirates izobhekana neKaizer Chiefs kwiCarling Black Label Champions Cup ngoMgqibelo ngo15h00 eFNB Stadium, eGoli. Kulindeleke ukuba la makilabhu asebenzise lo mdlalo ukubuyisa isithunzi sawo njengoba womabili engenzanga kahle ngesizini edlule.
UThamsanqa “General” Sangweni osanda kujoyina iBucs utshele ILANGA izolo ngoLwesithathu ntambama ukuthi nakuba benamasonto amabili nje kuphela beqalile ukulungiselela ukuqala kwesizini ezayo kodwa bazimisele ngokuwunqoba nakanjani lo mdlalo ukujabulisa abathandi beZimnyama.
“Lo mdlalo kithina kasiwuthathi njengowobungani. Sifuna ukubuyisa isithunzi sekilabhu kule sizini. Umphumela omuhle ungasinika ugqozi olukhulu ngaphambi kokuqala kwesizini. Umqeqeshi wethu (uKjell Jonevret) ubegxile kakhulu ekulweni nokuthi sibe qatha,” kusho lo mdlali ozokube eqala ukugijima lo mdlalo othathwa njengomkhulukazi ebholeni lakuleli.
Uthi uthole iziyalo nakumfowabo omdala, uSiyabonga “Nsimbi” Sangweni ogijime imidlalo eminingi yomkhaya emele iBucs. Uthi umdonse ngendlebe ukubambisana nabalingani bakhe. Ejimini yeBucs izolo bekunabadlali abangama-37 okulindeleke ukuba abanye babo babolekiswe ngaphambi kokuqala kwesizini.
Le kilabhu igcine iqede konke noMusa Nyatama osayine ngokuqala kwaleli sonto kanti iyaqina imibiko eyamanisa uMilutin Sredojevic waseSerbia nale kilabhu ake wayicija phambilini. Nokho kakucaci ukuthi uzoqashwa kusiphi isikhundla uma ebuya.