Bayazisola abalandeli beChiefs neBucs
Sebevukwa wusinga lokubuka iCarling Cup
SEBEYAZISOLA abalandeli abazame ukuvukela umbuso weKaizer Chiefs ne-Orlando Pirates becikwa wumbozo webhola odlalwe yila makilabhu ngesizini edlule.
Ukuqeda kwala makilabhu unyaka wesibili enganqobanga sicoco kwiPremier Soccer League (PSL) ngesizini edlule, kwenze abanye abalandeli baqala umkhankaso wokuduba iCarling Black Label Champions Cup egijinywa yila makilabhu minyaka yonke ngaphambi kokuqala kwesizini.
Umdlalo wanonyaka weCarling Cup uzokuba ngoMgqibelo ngo15h00 eFNB Stadium, eSoweto. Amathikithi alo mdlalo athengiswe wonke kusasele amasonto amabili ukuba ugijinywe. Lokhu kuwushaye kwawuvithiza lo mkhankaso.
Kubuye kwabashiya bencela izithupha abanye abalandeli bokuqina bala makilabhu abebekulo mbhidlango wokudutshwa kwala makilabhu.
ILANGA lithintwe ngabalandeli abahlukene bala makilabhu ikakhulukazi baKwa- Zulu-Natal, belinxusa ukuba libazamele abantu elingathola kubona amathikithi alo mdlalo. Bakhale ngokuthi bathathe ngokudinwa, manje sebevukwa wusinga lokuya kulo mdlalo.
“Ngihlale ngilwisana nokuthengiswa kwamathikithi ngenani eliphezulu kodwa manje ngizimisele ngokulithenga ukuze ngiyobuka lo mdlalo,” kusho omunye umlandeli wePirates onxuse ukuba ligodlwe igama lakhe.
Leli phephandaba lithole ukuthi kunetekisi eqashwe ngabalandeli bePirates baseMgungundlovu ezolibangisa eGoli yize bengenawo amathikithi okungena enkundleni.
UNdodo Madonsela okuleli ziko labeBucs, uthe uyazi ngaleli tekisi. Uthi laba balandeli babulawe wumshayeli abebemcele ukuba abathengele amathikithi kodwa akaze akwenza lokho. Uthi banethemba lokuwathola phambili.
USello Machaka ongumlandeli wokuqina weChiefs, uvumile ukuthi bakhona abalandeli beziMpofana ababathintayo bekhala ngokungabi nawo amathikithi.
Unxuse labo abawathenge ngamaningi ukuba bawadayise ngemali yawo, bangenzi inzuzo.
“Ngicela nabadlali ukuba bazimisele enkundleni ukuze abalandeli bengezogcina sebephuza utshwala ngenxa yebhola elizelisayo. Kasifuni ukuphinda sibone okusenze ngesizini edlule, ukubukiswa ibhola elingahehi,” kusho uMachaka.
UJoyce “Mama Joy” Chauke ongumlandeli wokuqina wePirates, uqale wagcizelela ukuthi ubengahambisani nokudutshwa kwemidlalo. Uthi uwathenge kusenesikhathi amathikithi akhe nawengane yakhe. Unxuse ihhovisi lePirates ukwenza okuthile ukusiza laba balandeli baseMgungundlovu abangenawo amathikithi, azwakalise ukuthi bahlala beyihambela imidlalo yale kilabhu.
“IChiefs kumele isinike le nkomishi ngoba isazokwazi ukulwela iMTN8 esingekho thina kuyona, futhi-ke isinayo inkomishi yempuphu (iBokone Bophirima Cup),” kusho uMama Joy ngolukhulu uhleko.
Lapha kubhekeke u-Oupa Manyisa ongukaputeni wePirates abange ukukhonya esiswini noSiphiwe “Shabba” Tshabalala oyintandokazi yabalandeli beziMpofana. UShabba ubuya ekulimaleni kanti uSteve Komphela, ocija iChiefs, wethembise ukuthi kuzofika lo mdlalo eseluleme.
IChiefs kumele isinike le nkomishi ... isazokwazi ukulwela iMTN8 yona...