Kufe amaphoyisa ngenxa yesikhwele
EKHASINI 3: Elinye belinukwa ekwebiweni kwezimoto
LIGAJWE yisikhwele ladubula intombi yalo maqede labhekisa umbhobho wenganono kulona lazingqokloza ikhanda lashona ngoLwesibili iphoyisa laseJozini, enyakatho-mpumalanga yeKwaZulu-Natal, elike lanukwa ngokuhlangana nezigebengu ezeba izimoto.
Sishaqise abaningi lesi sehlakalo esenzeke ebusuku emgwaqweni ophakathi kwesiteshi samaphoyisa nehhotela iTiger Lodge, eJozini.
Abezwe leli phoyisa lidubula, bathi isibhamu siqhume amahlandla ayisi-7, izinhlamvu zingena kowesifazane kakhulu. Ngesikhathi ILANGA lifika endaweni yesigameko, lifice isidumbu sikaConstable Sithabiso “Stha” Mpanza (24) wasoPhondweni nesikaConstable Sifiso “Ayah” Sibiya (30) wasoThobothini zidindilize eduze komgwaqo, zopha.
Inqwaba yamaphoyisa namalunga omphakathi abeseme izixongololo endaweni yesigameko, ebambe amakhanda ebabaza le nhlekelele. Abanye abebengabangani bakaConst Mpanza, bebethi bese kuyisikhathi eside ehlukunyezwa nguConst Sibiya. “Uqalile nje lo nyaka, ubesembulalele amafoni ayisi-6 ngoba egajwe yisikhwele.
"Kulena yokugcina (uConst Mpanza) uze wayoboleka imali ewu-R1 500 ukuze ayithenge,” kusho omunye wabangani. Elinye iphoyisa ebelikhuluma kulesi sixongololo lithe: “Ngike ngamkhuza u-Ayah ngathi makahlukane nengane yabantu ngoba kayisamfuni, makayibuyisele ifoni yayo kodwa waba nenkani.
"Ngabe konke lokhu kakwenzekanga ukuba wemukele ukuthi ucu kalusahlangani,” kusho leli phoyisa. UMnu Blessing Gumede ongumnikazi wendawo lapho bekuqashe khona uConst Mpanza, ukuqinisekisile ukuthi uthando lwala maphoyisa belungeluhle neze ngenxa yokuhlala njalo exabana.
“UStha bekungumshana wami, bekuthi uma sebexabana ngiye ngiyobalamula. Le ndoda ibinesikhwele ingafuni lutho ngaye ngoba ibifuna ukumenza umakoti manje umshana wami ubeseyingane. Kwenzeka lesi sehlakalo nje, ngoMsombuluko ufikile uSibiya wacekela phansi yonke into kamshana okubalwa amafriji, i- microwave nesitofu washiya kuma- hlikihliki endlini.
Kasazi ubedinwe yini,” kusho uMnu Gumede.
Uthi bekuthi uma eyobalamula, uConst Sibiya angasho ukuthi yini abayibangayo.
Elinye iphoyisa ebelisondelene nalezi zithandani lithe: “Into ecike kakhulu uSibiya wukuthi uke wabona le ntombi yakhe ilethwa ngenye indoda ngemoto emsebenzini. "Ubebalandela ngemuva yena elokhu ebabuka, sengathi kumcasule kakhulu lokhu ngoba uzitshele ukuthi useqomile.” ILANGA LangeSonto lomhla ziyisi-6 kwephezulu, libike ngokutitinywa kowesilisa obesolwa ngokuthinteka ekwebeni izimoto ziweliselwe eMozambique. Ngesikhathi lona wesilisa egonyuluka, uqoshiwe kwathi abekusho kwasatshalaliswa ezinkundleni zokuxhumana. Kubantu ababalile wathi usebenzisana nabo abangamaphoyisa, kukhona negama likaConst Sibiya. Okhulumela amaphoyisa aseJozini, uCapt Senzo Gumede, uthe sibashaqise kakhulu lesi sigameko kangangokuba wonke amaphoyisa aseJozini azodinga ukwelulekwa ngokomqondo ngoba okwenzekile kakwemukeleki namanje.
Bebehlale bexabana nentombi yalo, liphihlize amafoni ayo ayisi-6 nje kulo nyaka. Ucu belungasahla...