Anelinye iqhinga amaqembu aphikisayo
Athi kawakapheli amandla
AMAPHISI ezepolitiki asaqhubeka nokuzingela ikhanda likaMengameli Jacob Zuma njengoba iDemocratic Alliance (DA) imemezele ekhasini layo ezinkundleni zokuxhumana ukuthi namuhla ngoLwesine lizophakamisa ukuba lihlakazwe iphalamende kube nokhetho olusheshayo.
Lesi simemezelo senzeka emuva kokuba imizamo yamaqembu aphikisayo yokuqumba phansi umengameli Zuma ngevoti lokungamethembi ngoLwesithathu iphunzile njengoba amalunga e-African National Congress (ANC) ekhombise ukuthi asamthanda ephethe umengameli.
Bese kungokwesi-8 kuvotelwa ukungamethembi uMengameli Zuma. Kulokhu kuvotwe ngokuyimfihlo emuva kokuba amaqembu aphikisayo enikele enkantolo ngoNhlangulana (June) - enzela ukuthi uma kunamalunga e-ANC anengebhe yokukhahlela umengameli akwazi ukukwenza lokho ecashile.
Nokho lokho kufane nokuthela amanzi emhlane wedada. Imiphumela iveze ukuthi ali-177 amalunga avotele ukungamethembi umengameli kanti ali-198 akhombise ukumethemba kanti ayisi-9 ahoxile ekuvoteni. IDA ithi iNingizimu Afrika ifanelwe ngokungcono kakhulu.
Ngemuva kwemiphumela yangoLwesibili umholi weDA, uMnu Mmusi Maimane udalule, ukuthi bazobambisana ne-Economic Freedom Fighters (EFF) ecaleni lokuchitha umengameli ngokwenkantolo kanti basozoqhubeka namacala enkohlakalo abhekene nawo okumele ahlale eNkantolo yokuDluliswa kwamaCala mhla zili-15 kuMandulo (September).
“Ukuphunyula kukaMengameli Zuma ngembobo yenaliti kulolu hlelo kukhombisa ngokusobala ukuthi baningi abangasamdingi, okubalwa namalunga eqembu lakhe njengoba kuvela ukuthi bangaphezulu kwama-20 abavote nathi,” kusho uMnu Maimane.
Uthi kabapheli mandla emizameni yabo yokuqinisekisa ukuthi uMengameli Zuma uyashenxa esikhundleni. UMnu Mbuyiseni Ndlozi okhulumela i-EFF, uthe bajabulile ngendlela okuvotwe ngayo nangemiphumela ngoba kusho ngokusobala ukuthi bakhona ngaphakathi kwi-ANC abahambisana nabo.
“Imiphumela yayizolo ikhombise ngokusobala ukuhlukana kweANC nokuthi baningi abangasamfuni esikhundleni. Lokhu kusinikeza ugqozi njengoba sinecala lokumchitha ngenkantolo okumele lihlale mhla ziyisihlanu kuMandulo,” kusho uMnu Ndlozi.
Umholi we-United Democratic Movement (UDM), uJenene Bantu Holomisa, uthe imiphumela ikhombisa ngokusobala ukuthi umbuso uyashabalala kwi-ANC kanti bahambisana ne-EFF ecaleni lokumgudluza ngokwenkantolo.
USotswebhu we-ANC, uMnu Jackson Mthembu, uthe okubalulekile wukuthi bakwazile ukuwanqoba amaqembu aphikisayo emizameni yawo yokugudluza umengameli.
“Silunqobile lolu hlelo ngakho kumele sibheke phambili manje sibumbe iqembu ukuze sikwazi ukuya okhethweni lwangowezi-2019 siyimbumba, siqinile,” kusho uMnu Mthembu.
Uthe ngeke bazixake ngokuphenya amalunga abo angavotanga ngokwemiyalelo yeqembu. Umhlaziyi wezepolitiki, uMnu Justice Malala, ekhuluma kwi-eNCA uthe mancane amathuba okuba amaqembu aphikisayo aphumelele ekugudluzeni umengameli ngokwenkantolo.
“Uhlelo lokugudluza umengameli ngokwenkantolo lusho ukuthi kumele amalunga ephalamende angaphezulu kwengxenye ahambisane nalo. Uma ubheka, ngoLwesibili kube nzima ukuthi amaqembu aphikisayo afinyelele engxenyeni ngakho kuzoba nzima ukuthi luphumelele lolu hlelo,” kusho uMnu Malala.