UKHALA NGOMFOWABO OPHILA NGOKUGULA
USEFISA ngisho ukuzibulala owesifazane waKwaDumisa, eningizimu yeKwaZulu-Natal, othi usekhathele wukuhlukunyezwa ngumfowabo ombopha ngezintambo uma evukwe wukugula. UNkz Nomthandazo Mkhize (31), uthi unenkinga yengqondo ebizwa ngeBorderline Personality Disorder, emenza asheshe ukuthukuthela, uma kukhona okumcasulayo angaze akhiphe ngisho isidumbu. Uthi umfowabo, uMnu Mthokozisi Mkhize (35) oyiphoyisa laseMtateni eThekwini, uvele ambophele ensikeni kaveranda izandla azinsinye ngentambo azihlanganise nensika uma esevukwe wukugula. Uthi ngaphambi kokuba amenze lokhu, uqala amshaye aze amkliye.
Ekhuluma neLANGA, uthi usekhulume naye kaningi ukuthi akayithandi le nto ayenzayo uma evukwe wukugula kodwa amshaye indiva. “Indlela angibopha kabuhlungu ngayo umfowethu, ngiqaqwa ngamaphoyisa senginezihlisa ezingalweni lapho ebenginsinywe khona ngentambo. Kwehlula ngisho sengikhala ngendlala namakhaza kodwa angafuni ukunginika ijezi ngigqoke. Ngisho ngicela ukuba angiqaqe kancane ngidle, ngiphuze namaphilisi ami okugula, uyenqaba. Baze bangiqaqe uma sekufike amaphoyisa noma ngabe afika ebusuku kanjani mina ngilokhu ngiboshelwe emnyango. Lolu daba lokuhlukumezeka kwami sengike ngalubika kwabezenhlalakahle kodwa kangilutholi usizo njengoba bafike ekhaya bamkhuza nokuthi uma sengiphinda sengigula enze okufanayo,” kusho uNkz Mkhize.
Uthi useke wavula ngisho icala emaphoyiseni kodwa unina, uNkk Thoko Mkhize ( 63) wamncenga wathi makalesule. Ugcine elisulile kodwa manje uthi useyazisola ngoba umfowabo akashintshi. UNkk Mkhize ekhuluma neLANGA uthe baze bambophe nje uNkz Mkhize, yingoba uyabahlukumeza uma esevukwe wukugula kwakhe. Uthi useke wambilisela amanzi wamshisa ngawo, wabulala amafasitela azo zonke izindlu ewaphahlaza ngamatshe.
“Lo mntwana usengihlukumeze kakhulu futhi ukugula kwakhe kwala mina kakhulu. Uma sekumvukile uke aboleke ngisho umlalazi komakhelwane ethi ufuna ukulola ubhushu azongibulala ngawo. Ngelinye ilanga ngithe ngibuye enkonzweni ngafika esengikhiyele emzini wami ngaze ngayolala komakhelwane engafuni ukuvula. Ukugula kumvuka njalo nje yingoba akafuni ukudla amaphilisi. Uhamba etshela abangani bakhe ukuthi ngeke asewadla amaphilisi okugula usekhathele yiwona. Kangisazi ukuthi sizomenzanjani ngoba unenkani enjalo nje. Ubona sengathi ngivuna umfowabo kanti nguyena onenkinga. Ngeke ngilwe nomfowabo mina engangihlukumezi ngalutho.
"Ngike ngamthatha ngamyisa esibhedlela esegula ngaphenduka isilima phambi kwamanesi eqa ngisayokhipha ikhadi lakhe lasesibhedlela. Ngithe ngibuya nekhadi akasabonwa nangalukhalo. Sengitshelwa ngonogada ukuthi bambonile ephuma egibela itekisi. Ngize ngafonela umfundisi wami ukuba makayobheka ekhaya ngoba kangazi ukuthi uzofika enze muphi umonakalo uma esefika ezinganeni ezisele zodwa. Mina ngifisa athole indawo yakhe lapho ezohlala khona yedwa ngoba kakuhlaleki naye,” kusho uNkk Mkhize.
UMnu Mkhize ongumfowabo, uvumile ukuthi uyambophela ensikeni kaveranda udadewabo uma esevukwe wukugula. “Ngikwenza lokhu ngoba ngisuke ngivikela umama nezinye izingane zasekhaya ngoba uma egula uvele athathe ubhushu athi uyaqeda ngabo. Kuningi asihlukumeze ngakho lapha ekhaya njengoba eke akhiphe izintsha emakhabethini aziphahlaze phansi kugcwale amabhodlela endlini. Unamanga uma ethi wangivulela icala. Empeleni yithi esimvulela icala emaphoyiseni,” kusho uMnu Mkhize.
Okhulumela amaphoyisa aKwaZulu-Natal, uColonel Thembeka Mbhele, uthe izolo ngoLwesithathu njengoba bekuyiholidi kabakwazi ukuxhumana nomphenyi wecala.