Uvalele abanebala elimhlophe ngothango
Ubabize ngezinkawu
KUSABATSHAZWA ihlazo lowesifazane osolwa ngokuvalela amalunga omndeni anebala elimhlophe ngoba ethi ayizinkawu.
Umphakathi waseThembeni eMzimkhulu, eningizimu yeKwaZulu-Natal, namanje kawuwuvali umlomo ngesenzo salona wesifazane okuthiwa uvele wabiyela umuzi wakwaDlamini onamalunga ayisi-7 anebala elimhlophe ngoba ethi ayizinkawu.
Kuthiwa lona wesifazane ubiyele lo muzi wangalifaka isango ngenhloso yokuthi bangaphumeli ngaphandle kwegceke.
Ngokusho komthombo weLANGA, bese kuphele isonto lonke lo mndeni uvaleleke egcekeni.
Lona wesifazane ufike ngoMbasa (April) kule ndawo wakha umuzi wakhe eduze nowakwaDlamini. Kuthiwa ufike endaweni wavula ibhizinisi lokudayisa utshwala.
UMnu Vusi Dlamini, oyilunga lalo mndeni, uthi sibuhlungu isimo umndeni wakhe ohlala ngaphansi kwaso njengoba uze waphoqeleka ukuvula “upotsho” ukuze izingane zikwazi ukuphuma ziye esikoleni.
UMnu Dlamini uthi konke kuqale ngesikhathi lona wesifazane esehlala kule ndawo.
“Sengineminyaka ngakhe kule ndawo, kuthe ngonyaka ophelile lona wesifazane wafika wazokwakha umuzi wakhe eduze nakwami. NgoMbasa (April) ungenile nomyeni wakhe bavula ibhizinisi lokudayisa utshwala.
“Kuhambe isikhathi wangenelwa ngamaphoyisa ambopha ngoba emsola ngokudayisa izidakamizwa. Usuke lapho wangithuka esola mina nomndeni wami ukuthi simbizele amaphoyisa yize bengingakwenzanga lokho.
“Kuqale lapho ukungezwani phakathi kwethu naye. Ngenxa yokuthi kangihlali kwami isikhathi esiningi, bengijwayele ukuthola imiyalezo kunkosikazi engitshela ukuthi uyabathuka umakhelwane. Bengingakunaki konke lokhu ngoba kangizwani nomsindo. Ngesonto eliphelile uthumele umuntu ukuba ayobiyela ngocingo asivalele ngaphakathi.
“Ngesikhathi ngibikelwa lokhu bengizitshela ukuthi izingane zidlala ngami. Ngiyile khona ngafica kubiyelwe umuzi wami wonke, lingekho nesango lokungena ngaphakathi. Uma ngimbuza ukuthi ukwenzeleni lokhu, uthe ufuna ukusivalela ngoba siyizinkawu, sifanelwe wukuhlala lapho kugcinwa khona izilwane.
“Kuphele isonto lonke izingane zami zivalelwe ngaphakathi kangangoba kuze kwaphoqa ukuba zivule isikhala lapho zizokwazi ukuphuma khona,” kusho yena.
Uthi banikele emaphoyiseni bayowabikela ngalolu daba kodwa abatshela ukuthi ngeke akwazi ukubavulela icala, into angayenza wukuxoxa naye lona wesifazane ukuze ezobavulela indlela yokuphuma.
“Njengoba sikhuluma nje, izingane zami zisavalelekile, kayikho indlela asayivulile. Uma ngicabanga ngale nto, ngifikelwa wumunyu ngoba kangazi lona wesifazane yini engaka esimenze yona njengoba ekhetha ukusiphathisa okwezilwane nje,” kusho yena.
Okhulumela i-Albinism Society KwaZulu-Natal, uMnu Bhekisisa Maxwell Thabethe, uthe kuyihlazo ukuthi kunomuntu ongaze achithe imali yakhe ngoba efuna ukuvalela abantu abanebala elimhlophe. Uthi umndeni wakwaDlamini ungakwazi ukuvula icala njengoba ubizwe ngezinkawu.
“Lokhu akwenzile kuphambene nomthetho, kumele umndeni wakwaDlamini uyovula icala ngoba uwehlise isithunzi ngokuwubiza ngezinkawu. Lokhu kuyicala, sizowulekelela lo mndeni ukuze uthathe izinyathelo,” kusho yena.
Okhulumela uMnyango wezokuThuthukiswa koMphakathi KwaZulu-Natal, uMnu Vukani Mbhele, naye uhambe emazwini kaMnu Thabethe wathi umndeni kumele uvule icala ngoba ubizwe ngezilwane, wehliswa nesithunzi kanti udaba ungaludlulisela nasenhlanganweni elwela amalungelo abantu.
Ucele imininingwane yomndeni wathembisa ukuthi umnyango uzolusukumela udaba uthole ukuthi kwenzekeni ukuze uzosizakala.