Ubanjwe yiphoyisa nabangani balo inkunzi
Lithe untshontshe imali yalo
USELAHLE ithemba owesilisa waseVryheid, enyakatho ye-KwaZuluNatal osola iphoyisa ngokumhlasela limbambe inkunzi lihamba nabangani balo.
UMnu Siphelele Magubane, uthi uselahle ithemba ngokuthi liyoke lithathelwe izinyathelo leli phoyisa athi lithathe izimpahla zakhe zokugqoka nomakhalekhukhwini wakhe emuva kokumhlasela elele nonina wengane yakhe.
Elandisa leli phephandaba ngokwenzekile, sekuphele unyaka wonke leli phoyisa lingathathelwa izinyathelo yize elivulele icala kanti nezimpahla zakhe kalifuni ukuzibuyisa. Uthi uyazana nephoyisa, uqale ukulazi ngowezi-2014 ngesikhathi esebenzela eGreytown.
Phambilini bebengamathe nolimi kodwa konke konakale ngesikhathi limhlasela endlini yakhe ngoba limsola ngokuntshontsha imali yalo. “Ngesikhathi ngisahlala eGreytown, besijwayelene naleli phoyisa singabangani. Kuhambe isikhathi waphela umsebenzi ngase ngiya eThekwini ngokomsebenzi.
"Kuthe ngonyaka ophelile ngahlangana nomunye umfana ebengijwayelene naye ngisahlala eGreytown, wangincenga ukuba ngihambe naye siye kubo. Ngenxa yokuthi bese nginesikhathi ngabagcina, ngivumile ukuya eGreytown yize bengingenayo imali. Sifike khona sahlala kwaba mnandi, lafika nalo leli phoyisa ngoba selizwile ukuthi ngikhona.
"Kuthe sekufanele ngihambe, langincenga ukuba ngihlale impelasonto yonke. Ngilichazelile ukuthi inkinga kangiyiphethe imali futhi bengingahlelanga ukuhlala isikhathi eside eGreytown. Sigcine sivumelene ngokuba ngizohlala. Kuthe ngelanga obekumele ngihambe ngalo, ngalitshela ukuthi linginikeze imali yokugibela ngizolifakela uma ngifika eThekwini kodwa lathi kalinayo.
"Sisuke lapho saya ebhange lakhipha u-R2 000, lacela ukuba ngilifakele wona ebhange ngoba kukhona ebelifuna ukumthumelela wona. Kule mali ngithathe u-R150 ngagibela ngawo ukuze ngifike eThekwini ngikhiphe kweyami ngiyibuyisele ngaphambi kokuba ngiyoyifaka ebhange njengoba belingicelile.
"Selihambile, ngizamile ukulishayela ucingo ngilazisa ukuthi ngizoyifaka ngakusasa imali ngoba ngihlephule kuyona eyokugibela kodwa ngangalithola kwazise belisemsebenzini,” kusho uMnu Magubane.
Uthi ufike eThekwini sekuhwalele namabhange esevaliwe wabona kungcono agoduke avuke ekuseni ayoyifaka imali isiphelele. Uzamile ukushayela leli phoyisa ucingo kodwa wangalithola. “Kuthe sengilele ebusuku, ngezwa kungqongqoza abantu. Kube wukuvula nje, kwangena amadoda amane nalo leli phoyisa sebengikhombe ngesibhamu.
"Ngibuzile ukuthi kwenzekeni langitshela ukuthi lifuna imali yalo engiyebile. Ngizamile ukuchaza ukuthi ngithathe u-R150 wokugibela kodwa ngizoyigcwa- lisa ekuseni kodwa kwanhlanga zimuka nomoya.
"Ngilinikezile imali yalo labe selithatha umakhalekhukhwini wami nesikhwama ebesigcwele izingubo zami zokugqoka langishiya nebezisemzimbeni. Konke lokhu likwenza ngikhonjwe ngesibhamu. Kuthe bengasanakile besaqoqa izinto zami endlini, ngaphuma ngabaleka ngaya kwamakhelwane ngacasha khona. Ngishayele amaphoyisa ucingo afika ngokushesha. Ngiwachazelile okwenzekile saya endlini kodwa safika bengasekho,” kusho yena.
Uthi uvuke ngakusasa wayovula icala emaphoyiseni wabika konke okwenzekile. Iphoyisa ebelimsiza uthi limbuze ukuthi kungani bengaluxoxi udaba ngoba bayazana. UMnu Magubane uthi akufunayo nje wukuba kubuye izimpahla zakhe liphinde libhekane nengalo yomthetho iphoyisa ngoba limhlasele kwakhe lamkhomba nangesibhamu.
Okhulumela amaphoyisa KwaZulu-Natal, uCol Thembeka Mbhele, izolo ngoLwesithathu uthe kabakwazi ukuqinisekisa ukuvulwa kwecala njengoba kuyiholidi abaseshi bebengekho wathi bazokwazi ukuqinisekisa namuhla ngoLwesine.
Lithathe konke wasala nakugqokile.