ZIMKHALELE ONTSHONTSHE ISIBHAMU SEPHOYISA
KUSALE kukhala ibhungezi esiteshini samaphoyisa saseNkandla, maphakathi neKwaZulu-Natal ngoMsombuluko kuhujwa owesilisa okuthiwa uhlwithe isibhamu sephoyisa lesifazane wakhala amaphepha.
Kuthiwa leli phoyisa beliyothenga ukudla kwaKFC kanti kunomfana olilandelayo, wavele wasidonsa isibhamu salo ebesigaxwe ethangeni washaya wachitha. Umthombo weLANGA uthi iphoyisa lizamile ukumhubha lo mfana kodwa lehluleka laze layobikela ozakwabo, kwaba wuchithisaka, amaphoyisa ethungatha umsolwa.
Uthi kuphume inqwaba yamaveni kwathiwa umsolwa ubaleke waze wayosithela ehlathini eliseduze nedolobha. Kugcine sekushiswa ihlathi emaceleni wonke ngoba bekuthiwa ungene khona kodwa lutho umsolwa.
“Iphoyisa belibambe ukudla ngesinye isandla kwasala phansi kwakudla lokho. Isibhamu sidonswe kalula, kangazi ukuthi besifaswe kanjani. Wonke umuntu ubedumele ngendlela okwenzeke ngayo ngenxa yesibindi salo mfana entshontsha isibhamu sephoyisa kalula kanjena," kusho umthombo.
Kuthiwa amaphoyisa kawalalanga ngoMsombuluko kuze kwacishe kwahamba izinkukhu emnyango efuna umsolwa kwazise yinto okubikwa ukuthi kayikaze yenzeke endaweni.
Umthombo uthi wonke amaphoyisa abekhuza umhlola ethi kuyicala elibomvu okwenziwe ngumsolwa kanti nawo azobhekana nenkinga yecala uma engathungathwa.
"Kakusisona isinqumo esilula esingathathwa ngumuntu owaziyo ukuthi uhulumeni usebenza kanjani. Abanye abantu bebehleka bethi linamanga iphoyisa liphisane ngesibhamu kwasho ukuthi kukhona ababonile abebeseduze,” kusho umthombo.
Omunye umthombo osonde- lene namaphoyisa, uthe lesi sibhamu besiyodayiswa njengoba amaphoyisa esizwe wukuthi kukhona ofonele umsolwa wathi ufuna isibhamu.
“Kuthe sekusilethile lokhu komfana phakathi nobusuku kanti lona usebize amaphoyisa. Ubanjwe kanjalo-ke futhi ubengeke atholakale,” kusho umthombo. Okhulumela amaphoyisa KwaZulu-Natal, uColonel Thembeka Mbhele, uthi utholakele umsolwa nesibhamu. Kuvulwe icala lokubamba inkunzi. “Uvelile eNkantolo yeMantshi eNkandla ngoLwesibili kodwa idokodo lisenkantolo,” kusho uColonel Mbhele.