KUZOHLONISHWA IZINKAKHA KOWENDONDO
KULINDELEKE izinkakha emcimbini wokuhlonishwa kwababambe iqhaza emikhakheni eyehlukene eNingizimu Afrika obizwa ngeNdondo Awards ozokuba seSouthern Sun Golden Horse Hotel, eMgungundlovu, maphakathi neKwaZuluNatal mhla zili-19 kwephezulu.
Umsunguli walo mcimbi, uMfu Caleb Mbokazi, uthe phakathi kwabazobe behlonishwa kubalwa inkakha yomsakazi ebengumphathi wokuqala weRadio Metro, uKoos Radebe, odume ngeleBhungane lendlela.
Iphimbo likaKoos lisakhumbuleka namanje oKhozini FM lapho eqale khona engumsakazi wezemidlalo. Wayengene esikhundleni somsakazi wezemidlalo owayedumile naye kakhulu ngaleyo minyaka, u-Elijah Thetha Masombuka (ongasekho) owayenkenteza uzibone usenkundleni yize usekhaya.
Kuzohlonishwa neqembu lomculo we-gospel labesifazane lasesifundazweni iMpumalanga, iMasibuyele kuJehova. Leli qembu like lashisa izikhotha eminyakeni ye-1990 licula lingaphelezelwa yizinsimbi.
Kwabanye abazohlonishwa kubalwa noMnu Norman Bond oshone kulo nyaka, odume njengemali KwaNongoma, enyakatho yeKwaZuluNatal. Ungomunye wabamhlophe abehlule ubandlululo waganwa ngabesifazane abampisholo kungakavunyelwa ukuba kwenziwe lokho kuleli.
Ubekhuluma isiZulu soqobo azi lonke usikompilo lwesizwe samaZulu. Kulo mcimbi kulindeleke ukuba kube khona nabavela emazweni aseAfrika okubalwa kuwona neRwanda. Baningi osaziwayo asebehlabene ngale ndondo kubalwa uRay Phiri noSifiso Ncwane (bobabili abangasekho).