Isasasa lilethwa ngabalandeli
Yibona abaphethe umaskandi
ISASASA lemicimbi kamasikandi seliqutshulwa yibona uqobo abalandeli balo mculo ngenxa yokuzimisela kwabo uma belungiselela umcimbi osuke uzokuba khona.
Empeleni abaculi nabo sebekhuthazwa wukubona ukuhlangana kwezinkumbi zabalandeli babo nendlela okusuke kugqokwe ngayo. Lokhu sikubonile kwiMpucuzeko Masikandi Festival ebisePeople’s Park eMoses Mabhida Stadium, eThekwini ngenyanga edlule.
Lo mcimbi waziwa ngeWorld Cup yomasikandi ngoba abalandeli bawuhlelela kusenesikhathi kanti nakweminye kuba ngesifanayo. Imicimbi kamasikandi ngokujwayelekile iqala ekuseni kodwa abalandeli abasuke begqoke imifaniswano batheleka ngezikhathi zantambama ngokudedelana ngokwamaqembu abo noma ngokwabaculi ababalandelayo.
Abalandeli bakaKhuzani “Ndlamlenze” Mpungose (ezaKwaGuqa) baqale bayohlangana bonke eGugu Dlamini Park, eWorkshop, eThekwini. Baqashe indawo okuyilapho izinduna zabalandeli zidayisa khona izikibha namavuvuzela a- blue - okuwumbala osetshenziswa ngabalandeli balo mculi.
Emuva kwesikhashana kutheleke uKhuzani wadlulisa izinkulumo base begcwala umgwaqo sebelibangise ePeople's Park lapho-ke besekuvale kwasani ngenxa yobuningi babo. Ngaleso sikhathi uKhuzani ubehamba nabo evele okhakhayini lwemoto eyisilahla bekhuza iziqubulo ezithi “Gwaguqa uKhuba usevumile” nenye yezingoma ethi, “Nangu uKhuba usefikile”.
Yibona abokuqala laba balandeli abaviliyelile, bese kushaye nehora lesibili ntambama.
Emuva kwalokho kulandele oSaziwayo (ezaKwaBuyephethe) bona abebehlangene eWorkshop nabo bebehlobe ngombala wabo omhlophe nomunye omnyama, behambisana nabakaMajotha Zungu emviliyelweni wabo. Nabo bebecula izingoma ezeseka iqhawe labo.
Umviliyelo wesithathu kube ngowabalandeli bakaMjikijelwa “iChalaha likaShafuza‚” Ngubane (iziHonga) abangabanye abebephume ngezinkani kulo mcimbi - bethuse abaningi ngoba lokhu bekungalindelekile.
Bebehlobe ngombala o- powder blue ezikibheni namakepisi abhalwe ukuthi “Mjiks‚” bekhuza iziqubulo ezithi “Bathathe weChalaha”. Ngenxa yokuqhamuka kwabo ngobuningi, abantu bebebuzana ukuthi sezivukaphi iziHonga.
Emuva kwezeChalaha kutheleke abalandeli bakaMthandeni “iGcokama Elisha‚” Manqele (EzaKwaPhumudelile), nabo bebehlangane eWorkshop.
Bebegqoke izikibha, ama- tracksuit namakepisi abovu abhalwe iGcokama. Kawasali amathawula amhlophe namabhelunde. Iqembu elivalile ngokutheleka enkundleni sekugamenxe ihora lesine ntambama, kube ngabalandeli baMageza Amahle (ezaKwaDlulujeqeze). Bona bebehlangane eDurban Station. Bebekhuza iziqubulo ezithi “Yayithini iNdidane‚”, bese bevuma abanye bathi “Yes”. Zona bezihlobe ngombala o- lime ngenhla kube ngomnyama ngezansi.
Esikhathini esedlule bekubukwa abaculi ukuthi bafika ndlelani emicimbini kodwa manje sekubukwa abalandeli, okuyikhona osekukhombisa amandla alowo mculi abamlandelayo. Bekuphazamiseka abanye abaculi ngesikhathi benandisa uma sebeqhamukile abalandeli befika ngemiviliyelo yabo.
Banandisile bonke abaculi kodwa kubaculi abasangenisa endimeni, ngeke umshiye ngaphandle uMalahle obehamba nomfana omncane ngoba izihlwele zehlulekile wukuzibamba yinjabulo zaze zamcela impinda. Kwale isikhathi baphika abaphathi bohlelo.
Sekungena abaculi abanegama, kucace lapho-ke ukuthi isiteji siyabhodloka, igidangoma likaBuselaphi Gxowa lenza ezibukwayo. Kube nguMkhathazi, amagidangoma akhe asigqobhoza futhi zagculiseka izinkumbi zabantu ngaye ngokunjalo noSgwebo kanti ezeBhova (Abafana bakaMgqumeni) zigile ezibukwayo ngomfutho ezingene ngawo esiteji kwanyakaza kwasani. Bezihamba nensizwa ekhubazekile, engenayo imilenze kodwa igqoza, wena ubungaze uyidabukele.
Esigabeni sokugcina somcimbi bese kubhekwe ngabomvu ukudlalwa kwezigingci bukhoma kwazise laba abanye bebelingisa amaCD. Ukushuba kulesi sigaba kuqale ngeqembu iziNgqongqo (uMfiliseni Magubane noMzovukile “Jaiva” Khanyeza), lapho bebezishaya baze basale bobabili bechomelana ngentambo kwachwaza inkundla.
Badlale kahle nabanye, uThokozani “Somanandi” Langa, oSaziwayo, u-Ali Mgube, uMjikijelwa, uMfezemnyama, uShwi noMtekhala kodwa Amageza Amahle asithathile isicoco ngokudlala bukhoma iGcokama
ngokwezihlwele futhi kwaphunywa kukhulunywa ngawo.
Kulandele iGcokama Elisha elingene nomfana omncane obegqoke inabukeni, oxebule intambo kwamangala abaningi kanti nalo lizibambele mathupha intambo kwenye yezingoma laze lasho lathi: “Sengiyazibambela-ke le ntambo enezintambo ezili-12”.
Lethulwe yimbongi yalo, uMphako Mkhwanazi ngaphambi kokuba licule. Umcimbi uvalwe nguKhuzani ongene egqoke impulampula e- blue, ephethe isihlangu eside ezisithe ngaso ebusweni kwabhamuka umlilo owubukhazikhazi esecula.
Ubuze izihlwele ukuthi ziyazi yini ukuthi uzondelwani, zathi cha. Uthe uzondelwa lo mbala o- blue ogcwele inkundla yonke.