MASIPHATHE KAHLE ABANTU BESIFAZANE
SIYAZI ukuthi ngesonto eledlule sibhale lapha siphawula ngenyanga yokubungaza abesifazane kanti nanamuhla sizophinde siphawule sigxile kuyona futhi.
Phela njengoba sishilo ngalo isonto eledlule, lena yinyanga ebalulekile esingeke sikwazi neze ukuyiziba, nangephutha.
Njengoba-ke sisekuyona le nyanga siyazi ukuthi miningi imicimbi enhlobonhlobo eqhubekayo yokubungaza le nyanga.
Namuhla nje ePlayhouse kuqala umcimbi obalulekile waminyaka yonke obizwa ngeSA Woman’s Art Festival (SAWAF), okudidiyelwe kuwo imidlalo yeshashalazi nezinye izinhlelo ezehlukene eziyingxenye yale migubho. Kuyajabulisa ukubona izikhungo ezahlukene zibamba iqhaza ekubungazeni imbokodo emphakathini.
Siyazi ukuthi miningi neminye imicimbi ehleliwe neyenzekayo yokugubha le nyanga. Sithi-ke kubalulekile ukuba umphakathi uyeseke le micimbi ngokuba uphume ngobuningi bawo, ube yingxenye yayo.
Sifisa futhi ukuqhubeka nokukhuthaza kanye nokugqugquzela ukuba banakekelwe futhi baphathwe kahle abantu besifazane, hhayi nje kuphela ngoba kuyinyanga yabo kodwa kufanele lokho kwenzeke njalo.