Babhoboka ngabakubonile osonkanyezi
INDABA ngokudalwa komuntu nomlando wobudlelwano bakhe noNkulunkulu, kayize ingayiphatha eyokuthi ngabe lukhona yini olunye uhlobo lwempilo ekhona ngaphandle kwalolu esinolwazi ngalo esiluthola ezifundweni ngezinto eziphilayo.
Ngezizathu ezahlukene, lo mbuzo ubungakaze uphenduleke ngokugculisayo futhi ulwazi olukhulayo nsuku zonke kwezobuchwepheshe lwenza ungasuki ezingqondweni zethu.
Lokho kwanda kolwazi kufakazelwa yimibhalo engcwele njengoba iBhayibheli lisho ukuthi ngemihla yokugcina ulwazi luyokwanda (Daniel 12:4).
Uma sikhuluma ngokwanda kolwazi, ngeke yasala indaba yomlando wokunyathela ebuswenimhlaba ( surface) beNyanga komuntu wakulo Mhlaba abuye azoqhubeka aphile nathi lapha eMhlabeni futhi angaphithani ingqondo.
Ithimba losonkanyezi abathathu base-United States of America (USA) bahamba ngendizamkhathi u-Apollo 11 okwakuzothi kulona, ababili kulawo madoda behlele ebuswenimhlaba beNyanga okokuqala ngqa emlandweni wesidalwa esingumuntu.
Nebala-ke kwenzeka lokhu zingama-20 kuNtulikazi (July) 1969. Nebala zafika zedlula lezo zindaba, umhlaba watshelwa ukuthi iNyanga lena yizwe eliyibhuqu njena okungekho lutho olumilile kuyona futhi umoya namanzi kakukho, kanjalo nomoya wokuphefumula kawukho njengoba osonkanyezi beziphathela umphako womoya wokuphefumula owanele isikhathi sonke sohambo lwabo.
Yingakho-ke nje nxa kukhona abakhuluma ngokuthi kunomantininiza ( unidentified flying objects - UFO) baye bachithwe ngokuthi bayahhuma nje kayikho into enjalo.
Kulezi zinsuku sekuqubuke imibiko ekhombisa ukuthi kakusikhona konke okwabikelwa izwe ngokwabonwa yila madoda amathathu - uNeil Armstrong, uBuzz Aldrin noMichael Collins - ebuswenimhlaba beNyanga.
Empeleni kuthiwa sebeyabhoboka manje osonkanyezi ngezinto ababezibonile, babikela iziphathimandla ngazo kodwa zafihlwa wuMnyango wezokuVikela wase-USA okuyiwona vele owengamele isikhungo sezomkhathi i- National Aeronautic Space Agency (NASA). Umbuzo olandela lapho ngothi pho izinkambo eziya enyangeni zanqanyulwa yini emuva kwalolo luka-Apollo 17? Osonkanyezi balimisa ngesihloko elithi “saxoshwa laphaya”.
Bese kuqubuka omunye othi, “Nxa kunjalo, pho kungani iNASA yakwazi ukuqhubeka nezinye izinkambo zika-Apollo 12-17”? Mhlawumbe impendulo ingase ithi kusobala ukuthi osonkanyezi laba ngamadoda anesibindi.
Ithimba lokuqala losonkanyezi elanyathela ebuswenimhlaba beNyanga, lalikhethwe embuthweni wezempi yasemoyeni, okuvamise ukuba yizinsizwa ezisencane ngeminyaka yobudala.
Phela kulezi zinkambo zomkhathi kudingeka umuntu osemusha noqatha ngoba kakusiwona umdlalo ukugqoka amagqikolo ezingubo zomkhathi futhi ubelethe isigubhu somoya wokuphefumula emkhathini okungekho isisindo kuwona.
Njengamanje labo sonkanyezi sebeyibutho elineminyaka engama-80 nangaphezulu. Bali-12 osonkanyezi abake banyathela ebuswenimhlaba beNyanga ababeyingxenye yezinkambo zikaApollo 11, 12, 14, 15, 16 no 17. Bayisi-6 abasaphila.
Abaka-Apollo 13 bavelelwa yingozi besaya phambili kwadingeka ukuba bajike bengasanyathelanga eNyangeni ngoba phakathi komonakalo owenzeka kwavuza ithangi lomphako womoya abawusebenzisa uma bekulolo hambo.
Sekuthe-ke ngokuhamba kwesikhathi yanda imibiko ethi kulolo luhambo bebebona emkhathini izindizamshini zohlobo olungaziwa ezivela kancane bese zibuye zinyamalale futhi ezi- nesivinini esikhulu. Isimo esivame ukubonakala yileso esiyinto efana nesoso lenkomishi esiphuza ngayo itiye. Lokhu kuqiniswa nayilabo sonkanyezi abangasayi eNyangeni kodwa abasuke benza ucwaningo besesiteshini somkhathi esiwumsebenzi owenziwa ngokuhlanganyela yiRussia ne-USA.
Nangalo uhambo lukaAmstrong, Aldrin noCollins lukaApollo 11, kubikwa ukuthi ngesikhathi esiyimizuzu emibili yokunqamuka kokuxhumana phakathi kwabasesikhungweni esisemhlabeni nala madoda okwenzeka esahambahamba phezu kweNyanga okuthiwa yayibangelwa wukugxambukela kwabo ontabakayikhonjwa laba. Nakho lokhu kade kufihliwe yonke le minyaka!
Kakugcini lapho, neziphuphutheki ( spacecraft) eziya kwiMars, esinye sazo esihleli kuwona lowaya mhlaba igama laso okuthiwa nguRover, sibuyisa izithombe lapha kwaMhlaba eziveza ukuthi kunezinto ezingezona ezemvelo, ezikhombisa ukuthi zakhiwa ngabantumbi (aliens).
Phela singeke sithi ngabantu ngokujwayelekile laba noma benezindiza ezibatshazwa ubuchwepheshe bezinga eliphezulu thina esingakafiki kulona.
Akwaziwa-ke ukuthi iziphathimandla zenqenani ukuyivuma imibiko enjalo ngoba lo mehluko oshiwo lapha ngabo kawuluphazamisi ngisho nokholo lwethu ngendalo njengoba sifunda ngayo eBhayibhelini.
Kakade iBhayibheli liyakhuluma ngezidalwa ezingebona abantu phaqa njengathi.