Kugxekwe i-IAAF kunqoba uWayde
Bahoxise imbangi yakhe
KUGXEKWE isinqumo se-International Association of Athletics Federation (IAAF) sokumisa imbangi kaWayde van Niekerk ( osesithombeni) ukungabambi iqhaza emjahweni wamanqamu we-400m onqotshwe yilo msubathi waseNingizimu Afrika ngesikhathi sika43:98.
I-IAAF ihoxise u-Isaac Makwala waseBotswana ukugijima owamanqmu noWayde ebangeni lika400m ngoLwesibili ebusuku kule midlalo ebizwa nge-IAAF World Championships eqale ngoLwesihlanu ezosongwa ngeSonto eLondon, e-England.
UMakwala ungomunye wabasubathi abalikhuphule kakhulu izinga kulo mqhudelwano kanti ubengasiza ukufaka ingcindezi kuWayde ukwenza kangcono irekhodi lomhlaba. UMakwala ube nenkinga ngemuva kokuba kutholakale ukuthi udle ukudla okungalungile. Uyalelwe yi-IAAF ukuba angagijimi okuyisenzo esingehlanga kahle kwabaningi kwazise ubebukeka esesimweni ezicija enkundleni.
Ukubuyela emjahweni, uWayde ophethe irekhodi lo mhlaba le400m (43:03) aliqophe nyakenye kuma-Olympic Game eBrazil, ushaye intambo ngesikhathi esingu-43:98 eshiya ngemizuzwana engama-43 uSteven Gardiner waseBahamas.
UWayde uye kulo mqhudelwano evele eyimfivilithi kwazise nangowezi-2015 eBeijing, eChina, unqobile.
Kusalindeleke lukhulu kuWayde njengoba esazogijima kweyamanqamu ye-200m no-Akani Simbine wakuleli ongenzanga kahle kwi100m ephuma endaweni yesi-5. Imidlalo yamanqamu ye-200m inamuhla ngoLwesine ngo-22h52. Namuhla uCaster uzogijima eyokuhlunga kwi-800m kanti uma enze kahle uzogijima eyamanqamu ngeSonto ebusuku aphinde agijime nakwi-relay ngosuku olufanayo.
Kushone usuku lwayizolo iNingizimu Afrika inezindondo ezine ezitholwe nguWayde noLuvo Manyonga abathole amagolide kwi-400m nakwiLong Jump ngokwehlukana kube nguCaster noRuswahl Samaai abathole ezethusi ngokwehlukana kwi-1500m nakwiLong Jump.