UBenni usebeke ithemba kubadlali
UBEKE ithemba kubadlali uBenni McCarthy ( osesithombeni) ongumqeqeshi omusha weCape Town City njengoba ezakhe zibhekene nomdlalo omqoka nePolokwane City kwi- Quarter Final yeMTN8 ngoMgqibelo ngo-15h00 eCape Town Stadium.
Lo mdlalo uzophenya isahluko esisha kuBenni ozakhele udumo engumgadli ongalibheki ipali emakilabhini ahlukene akuleli nakwawase-Europe. Lo mdlalo ngowakhe wokuqala ngqa njengomqeqeshi selokhu ebeke amakhokho ethala kumasizini ambalwa adlule.
Amehlo eNingizimu Afrika azokube ebheke kuyena njengoba enomlando omuhle ebholeni lakuleli njengomgadli.
UMcCarthy uthi usekwenze konke, ithemba lakhe uselibeke kubadlali.
“Kula masonto ambalwa ngiqal- ile ukulolonga ikilabhu ngijabule ngendlela abadlali bami abebenza ngayo ejimini, bakhombisa ukuba seqophelweni eliphezulu. Kangikungabazi ukuthi bazongifa- ka emkhakheni wokuqeqesha ngewini. Kwamina ngikulangazelele ukubona lo mdlalo. Ngifuna ukubona ukuthi abadlali bazokwenza lokhu engibayalele khona yini.
"Nginovalo oluncane ngePolokwane ngoba kangazi ukuthi iza nani kodwa-ke konke sekuyocaca enkundleni,” kusho uMcCarthy.
UBernard Molekwa obambe izintambo zokuqeqesha kwiPolokwane, uthi kabanavalo ngezikaMcCarthy.
“Kasizange sibe nezinguquko ezingako ekilabhini. Sithenge abadlali abambalwa kwahamba abambalwa, ngakho-ke ngeke senze izinguquko ezitheni ekilabhini esiqede ngayo isizini edlule. Amalungiselelo ahambe ngokohlelo, kasinamdlali olimele.
“Kunzima uma kuqala isizini ngoba abantu usuke ungazi ukuthi baphetheni. Sifana nezimpumputhe nje kulo mdlalo ngoba kasazi sizoficani phambili kungcono uma abantu sebeke badlala.
"Kodwa-ke siwulindele umdlalo futhi sinethemba lokuthi sizobuya nomphumela ogculisayo,” kusho uMolekwa.