ITULO LOKUKETULA UMBUSO WE-WITS
KUVELA itulo lokuketula umbuso weBidvest Wits eyizingqwele ze-MTN8 kanjalo neze-Absa Premiership.
IWits izovula isizini yezi2017/2018 yePremier Soccer League (PSL) ngokubhekana neLamontville Golden Arrows kwi- Quarter Final yeMTN 8 kusasa ngoLwesihlanu ngo-20h00 eBidvest Stadium, eGoli.
UClinton Larsen ocija Abafana Bes’thende utshele ILANGA ukuthi bafuna ukufaka esikoleni sikanobhutshuzwayo iziTshudeni ngokuziphoxa kuqala isizini.
Uthi uphethe ulozolo lwabadlali angangabazi ukuthi bazomtholela umphumela omuhle kulo mdlalo ongowokuqala kwisizini entsha.
Okumnika iqholo wukuthi amalungiselelo esizini entsha uthi ahambe ngokwezinhlelo zakhe kungafani nangesizini edlule.
Nokho uyavuma ukuthi umdlalo weWits uzokuba nzima kakhulu.
“Sinethemba elikhulu lokuthi abadlali bazobuya nomphumela omuhle kwazise siwulungiselele ngokweqophelo eliphezulu umdlalo.
"Ngeke isikhinyabeze inkundla yize noma incane kwazise sesiyazi kahle. Kungaba yiphutha elikhulu kubadlali bami uma bengathatha kalula lo mdlalo kwazise kakulula ukubuya nomphumela owudingayo kwiWits kumele silwe size siyophetha umdlalo ukuyehlula,” kusho uLarsen.
Uthi okumele bakwenze enkundleni wukuyihlasela zisuka ukuze ingakwazi ukuba ngaphezulu kwabo. Uthi okuhle kakhulu wukuthi uzogijima lo mdlalo ngesikimu aqale ngaso nangesizini edlule.
“Ngizokuya kulo mdlalo sekubuye uLehlohonolo Nonyane okuzofana nokuthi uqala isizini entsha kwazise uphuma ekulimaleni kwangesizini edlule. UNduduzo Sibiya obuya kwiBafana Bafana naye usekulungele ukumela ikilabhu kwazise emasontweni amathathu adlule ubejima ngokuzikhandla nekilabhu,” kusho uLarsen.
Uthi bangase baqede lingakasongwa leli sonto nonozinti abazama inhlanhla uSamkelo Mbambo noSherwin Naicker.