IDowns ilwela ukubamba iwindi leCaf
NoManyisa Izama ukuqeda ngoLebese
IMAMELODI Sundowns ilwela ukubamba umnqamulajuqu weConfederation of African Football (Caf) ngokufaka ngokushesha emabhukwini ayo u-Oupa Manyisa obengukaputeni we-Orlando Pirates noGeorge Lebese osejima notakalani beKaizer Chiefs.
ISundowns ibekelwe yiCaf usuku lwakusasa ngoLwesihlanu ukugcwalisa izikhala ezintathu esele nazo ukubhalisa abadlali ezogijima ngabo kwiCaf Champions League esisesigabeni samaQuarter Final kusona. UManyisa useshiyile kwiPirates njengoba imemezele ngeledlule ukuthi uselibangisa kwiDowns. Nokho lo mdlali silobe kuthiwa kusaxoxiswana ngendaba ethinta umholo wakhe kumaBrazilian.
ULebese ushovwe yiChiefs ekujimeni nesikwati esincane sale kilabhu emuva kokuba efake isicelo sokushiya le kilabhu alibangise eChloorkop njengoba enesifiso sokudlala kwiCaf.
UBobby Motaung oyimenenjajikelele yeChiefs uvumile ukuthi baxoxisana neDowns ngokudayiselana ngalo mdlali ozophelelwa yinkontileka ngoNhlangulana (June) wonyaka ozayo kule kilabhu yakwaMotaung.
UThulani “TT” Thuswa wezokuxhumana kwiDowns, uvumile ukuthi basalelwe yizikhala ezintathu kwiCaf kanjalo nokuthi umnqamulajuqu ukusasa ngoLwesihlanu.
“Empeleni kwakumele kuvalwe ngoMgqibelo odlule kodwa sanikwa umusa kuze kube nguLwesihlanu,” kusho uThuswa onqabile ukuphawula ngamagama abadlali abazobafaka kulezi zikhala.
Nokho ILANGA lithole ukuthi umdlali wesithathu ozofakwa nguBrimah Razak ongunozinti odabuka eGhana ozovala isikhala esivuleke kushiya uWayne Sandilands osejoyine iBucs.