UZODLALELA IBAFANA ESEMANZINI
UZODLUBHA ijezi leBafana Bafana egubuzelwe yifu elimnyama lokushonelwa nguyise u-Asavela Mbekile weMamelodi Sundowns.
Lo mdlali uqokelwe esikwatini seBafana esizodudulana neZambia kowokuhlungela i-African Nations Championship (Chan) ngoMgqibelo ngo-15h00 eBuffalo City Stadium, eBhayi. Lo mdlalo ngowomlenze wokuqala emzuliswaneni wokugcina wokuhlunga.
Umdlalo womlenze wesibili uzokuba ngoMgqibelo ozayo womhla zili-19 kuNcwaba (August) ngo-15h00 eNdola, eZambia.
ISouth African Fooball Association (Safa) ithathe isinqumo sokunika uMbekile ikhefu ngoMsombuluko ozayo ukuyokwenza amalungiselelo okufihla uyise oshone ngoLwesibili.
UStuart Baxter ocija iBafana, okumanje umatasa nokuhlanganisa iqembu azodlala ngalo neCape Verde Islands ngokuqala kukaMandulo (September) kuhlungelwa iNdebe yoMhlaba ezokuba seRussia, uthe usekhulumile nomqeqeshi kaKamohelo Mokotjo ogijima e-England ukukhulula lo mdlali. Kuleli sonto uBaxter uvakashele naseNaturena eyokwenza okufanayo kuSteve Komphela opheka iKaizer Chiefs.
“Kumele sisebenze kanzima ukunqoba iZambia. Kangilitholi ithuba elikahle lokwenza umsebenzi weBafana kwazise muningi. Ngibhekene nemidlalo yeChan lapho okugijima khona abadlali abazinze kuleli kuphela ekubeni neyokuhlungela eyoMhlaba isiseduze,” kusho uBaxter.
Uthi kumqoka ukwenza kahle kwiChan ukuze abadlali abasebenzisa khona bezozivulela amasango okungena esikwatini esizodlala eyokuhlungela iNdebe yoMhlaba lapho kusuke sekuboshelwe khona inqanawe.