I-KZN IQOKA ABAZOYIMELA E-NORTH WEST
BAZOQOKWA ngempelasonto abasubathi abazomela iKwaZulu-Natal Athletics (KZNA) kwiSouth African Cross Country Championships ezokuba ngenyanga ezayo eNorth West.
IKwaZulu-Natal izokuba namaChampionship ngoMgqibelo eRichmond Primary School. Abagijimi abenze kahle bazoqokelwa eqenjini lesifundazwe.
I-KZNA ibe namaligi ali-13 kuso sonke isifundazwe ukunika ithuba abasubathi abahlala kude namadolobha amakhulu.
KwiCross Country kwamukelwa abasubathi abaneminyaka eyisi-8 kuya phezulu.
I-KZNA ikubeke kwacaca ngaphambi kokuqala le midlalo ukuthi abasubathi abazothola ithuba lokumela isifundazwe ngabagijime amaligi angaphezulu kwamabili, kanti naseRichmond kuzothathwa abokuqala abayisi-6. Kule midlalo kugaduliswana kwi1km kuya ku-10km.
“Inhloso yeKZNA nonyaka wukuthumela iqembu elikhulu elizozuzela isifundazwe izindondo.
"Sithathe isinqumo sokusabalalisa lo mdlalo kuso sonke isifundazwe ukuze kungabi khona abasala ngaphandle.
"Siphinde samukela ngisho abasubathi abaneminyaka eyisi-8 ubudala ukubagqugquzela ukubamba iqhaza kwezemidlalo besebancane,” kusho uSello Mokoena ohola iKZNA. Abafuna ulwazi ngalo mjaho bangashayela ehhovisi leKZNA kwethi: 031 312 9374.
Abasubathi bomgwaqo bazokhiphana inkani kwiSugar Mama Savages 21km ne10km ngeSonto kusuka ngo-06h30 eMorningside Primary School. Ngolwazi kushayelwa uRobin Honneysett kwethi: 078 281 6981.
Kwaziswa abasubathi ukuthi kuyavalwa ukubhalisela umlenze wesihlanu weSpar Women’s Challenge engomhla wama-20 kwephezulu eThe Oval Alexandra Park, eMgungundlovu.
Abasubathi bangangena kwi-website ethi: www.sparwomenrace.co.za ukuthola ulwazi noma bashayele ehhovisi leKZNA.