ODABENI lukaMnu Mduduzi Manana, oyiphini likangqongqoshe wemfundo ephakeme, ovulelwe icala ngokushaya abesifazane ababili endaweni yobumnandi iCubana, eGoli ngempelasonto, nansi imibono:
UMFUNDISI wethu wayengakuthandazeleli ukuba ushaye abesifazene ngesikhathi usesontweni ngoNhlangulana (June) eCentral Methodist Mission. Thokozani Hlomuka
NGENXA yokuthi bebedakwe bonke makungathathwa uhlangothi, kakwaziwa okwenzeke laphaya nokho-ke ngiyakhuza mfana, umuntu wesifazane akashaywa nhlobo. Lumka Lulu Mxengwana
ABESIFAZANE sebenamalungelo okugcogcoma emakhanda abesilisa ngoba bayazi ukuthi uma uke wamthinta nje kuzosukunywa ngokushesha, sebezenza amadoda baze bakhohlwe wukuthi bangabesifazane. Alex Phiwe Mzukulu KaPhuthisela
MANJE uqonde ukuthi abesifazane kakufuneki babe nemibono ngezinto ezenzeka la ezweni? Dumi Nyandeni
CHA, wukuthi sekuyinsakavukela ukwedelela kwabesifazane ikakhulukazi esidlangaleni. Omunye uze asho athi, "ake ungithinte phela uzobona" ngoba nakhu azi ukuthi bayavunwa kungabe kusabhekwa ukuthi bekwenzenjani kuze kufike ekushayaneni. Alex Phiwe Mzukulu KaPhuthisela:
MAKABOSHWE, uyinja eshaya abantu besifazane ngoba benombono ohlukile kunaye ngobuholi be-African National Congress (ANC). Bigboy Wiseman Mkhize
INKINGA abantu besifazane babuye bakhulume kakhulu, bakhohlwe wukuthi phela thina bantu besilisa kasidalelwe ukukhuluma kakhulu njengabo. Mdlakadlaka Imfene Sbuh
KEPHA-KE nalo sisi kungani ebize uMduduzi Manana ngesitabane? Nawe-ke ngqongqoshe hhewu, bekungamele bese uphendula ngodlame ikakhulukazi ngoba uyilunga lomphakathi eliqavile. Bongani Nxumalo
KUNGCONO ngoba uManana uyazivumela ukuthi umshayile. Makungabe-ke sekukhulunywa ngoba nakhu kubhekwe ukuthi ngubani ozongena esikhundleni, indaba mayiqonde ngqo ukuthi lo wesifazane ubize lo wesilisa ngesitabane wamshaya. John John Gumede
UMUNTU wesilisa osesikhundleni yena wonke ukwazi ukubeka isandla! Ngokwami, amalunga e-ANC mawaboshwe akhishwe ezikhundleni konke nomengameli wakhona. Bongokuhle Gebane
VELE kwakuyini yona le nto yamalungelo ngoba kwakumele kuthiwe nje makuqhakanjiswe inhlonipho phambili. Sudden O Sibisi
KUFANA nokuthi sewumphelele umsebenzi lo ngqongqoshe ozehlise isithunzi ezindaweni zokubhenga aphinde ashaye nabantu besimame. Teko Mashiyamahle