Luzale umcimbi usizi lodlwenguliwe
SELUZALE umcimbi usizi olubhekene nowesifazane okhulume emsakazweni ngokubanjwa kwakhe inkunzi nokudlwengulwa ngamadoda ayisithupha wagcina ngokusuleleka ngesandulela ngculaza, wakhulelwa.
UMasindi Mzolo (okungelona igama lakhe langempela) wethule usizi lwakhe emsakazweni womphakathi iMbokodo FM ohlelweni lwasemini olwenziwa nguThami Ntombela (12h0015h00) oluthi Injobo Ithungelwa Ebandla.
Kujwayelekile ukuba kuqhamuke ezishaqisayo kulolu hlelo olungena ngoMsombuluko kuze kube nguLwesihlanu. Usizi lwalona wesifazane luholele ekubeni kusunguleke umcimbi wokukhuthazana kwabesifazane ezimweni ababhekana nazo.
Lo mcimbi uzoba ngoMgqibelo zili-12 kwephezulu kanti uhambisana nemigubho yenyanga yabo (abesifazane). Umcimbi uzoba seDurban Miracle Centre kusukela ngeleshumi ekuseni.
UNtombela uthi babonisane noMasindi ukuba benze le mbizo ngoba ethi ukhathazekile ngezingane ezitholakala zilahlwe emigqonyeni nsuku zaphuma, ekubeni yena ephila nayo eyakhe ayithola ngokudlwengulwa. “Sivumelane ngokuba sihlele lo mcimbi naye ngoba ethi uyakhathazeka ngalo mkhuba odlondlobalayo wokulahlwa kwezingane. Inhloso nje wukwakha abesifazane kule nyanga yabo,” kuchaza uNtombela.
Kuzobe kunezikhulumi nabaculi abanohlonze ikakhulukazi emculweni wokholo. Kubaculi abazonandisa kubalwa uSandile Khawula, uThobekile Mkhwanazi, uBuli Mhatu, uSphelele Shezi, uSgwili Zuma noDumi Mkokstad.