IZIKOLE ZASE-KZN EMBANGWENI WOBUNGQWELE KWEYE-COCA COLA
KUZOCACA ngoMgqibelo ngesikole esizomela iKwaZulu-Natal emidlalweni kazwelonke yeCopa Coca Cola U/15 ezoqala mhla zingama-26 isongwe zingama-31 kuMandulo (September) kophezulu eMangaung Out Door Centre, eFree State.
Izikole zaKwaZulu-Natal zizokhiphana inkani ngoMgqibelo eCator Manor Sports Ground, eThekwini.
Zonke izifunda ezili-12 seziqedile ukuhlungela lo mqhudelwano.
USmanga Mgenge ongunobhala weSouth African Schools Football Association (Sasfa) esifundazweni, uthe sebekulungele ukusingatha le midlalo.
Uthi bayafisa ukuthi isikole esizokudla ubhedu ngoMgqibelo senze okufanayo na- kwekazwelonke. Uthi bafuna senze okwenziwe yiMophela Primary yangaphandle kancane kwaseHammarsdale enqobe ezingeni likazwelonke kwiDanone Nations U/12 Cup.
Lesi sikole sizomela iNingizimu Afrika kweyomhlaba ngenyanga ezayo e-United States of America (USA), kanti sizokube siholwa nguyena uMgenge oyiMeya yaseMfolozi.
Selulonke uhlu lwezikole ezizoshukana ngoMgqibelo lumi kanje: Zama High (AmaJuba), JL Dube (Pinetown), Sukuma (uMgungundlovu), Sphapheme (Ugu), Welabasha (King Cetshwayo), Guzana (Ilembe), Latha Combined (uMzinyathi), King Senzangakhona (Zululand), Glenwood Boys (Umlazi), Steadville (uThukela), Snethezekile (uMkhanyakude) neZashuke (Harry Gwala).