BABHACILE ABASINDE KUQOTHWA UMNDENI
Bazwile ukuthi bazohlaselwa futhi
UBALEKE washiya kukhala ibhungezi emzini wawo umndeni wakwaNtshangase eMatini, eMamba, eShowe, enyakatho-mpumalanga neKwaZulu-Natal ngenxa yezinsongo zokuthi kuzoqedwa ngabasele kuwona emuva kokuba kuhlaselwe amalunga awo ngeSonto eledlule aqothwa ngenhlamvu.
Ilunga lomndeni, uNkz Xolisile Ntshangase, lithi kabasaphephile, yingakho bengasahlali kulo muzi. Uthi bezwile ngandlebenye ukuthi basazohlaselwa.
Kwenzeka lokhu nje, ILANGA lithole ukuthi sekushone elinye ilunga lalo mndeni, uMnu Nkanyiso Ntshangase, ebelingeniswe esibhedlela ngenxa yokudubuleka kabi kade kuhlaselwa lo mndeni.
Amaphoyisa kuthiwa anikele eThekwini abopha omunye wesilisa ngoLwesihlanu ongowesithathu, ababili bese bevele beboshiwe ngezinsolo zokubulawa kwamalunga alo mndeni.
Ngeledlule kuhlaselwe kwaNtshangase kwadutshulwa amalunga omndeni ayisihlanu evalelwe endlini. UMnu Gama Ntshangase noMnu Doda Bhekumgazi Ntshangase - obekumele athathe isihlalo sobukhosi - bashonele phakathi endlini kanti uMnu Bongani Bhengu oyisihlobo sakwaNtshangase, kuvela ukuthi ushonele ngaphandle kwendlu ezama ukubaleka.
UMnu Njabulo noMnu Nkanyiso bakwaNtshangase, bakwazile ukudlubulundela ngesikhathi sesigameko njengoba uNkanyiso eze washona ngoLwesihlanu.
ILANGA lithole ukuthi la malunga ashonile, amabili adutshuliwe kwase kokhelwa indlu ngomlilo ashiswa.
Kunezinsolo zombango wobukhosi bakwaNtshangase okuthiwa buphethwe yiNkosi Vela Shange. Lobu bukhosi kuthiwa babunikwe oShange emandulo ngabozalo lwakwaNtshangase ukuba babubambe.
INkosi Shange kubikwa ukuthi ibisibudedelile lobu bukhosi, isitifiketi yasinika uMnu Xolani Ntshangase nakuba ebengakagco- tshwa njengoba naye bekumele asidlulisele kuMnu Doda Ntshangase.
Phambilini ilunga lomndeni, uNkz Xolisile Ntshangase, lithe kwenzeka lokhu nje, bekuhlatshiwe kulo mndeni kunomsebenzi.
“UShange ubeseyiyona iNkosi endaweni kodwa izinto ezithinta ubukhosi ubesezidlulisile ngoba ubengenqabile nabo.
“Le nto bebeyihlele kahle ngoba baqale babhoncula amalambu akhanyisa emnyango kwase kuba mnyama emuva kokuba benze umonakalo,” kusho uNkz Ntshangase.
Utshele ILANGA ukuthi indlu egweve nobukhosi ngeyaKwaNjengonina kanti ubukhosi obasendlini yaseZithiya. Okhulumela amaphoyisa KwaZulu-Natal, uLt Colonel Thulani Zwane, uthi icala livulwe esiteshini samaphoyisa eMbongolwane, eShowe.
“Amaphoyisa abophe omunye umsolwa wesithathu ngoLwesihlanu oneminyaka engama-54 ubudala ozovela eNkantolo yeMantshi eShowe namhlanje (ngoMsombuluko),“kusho uLt Colonel Zwane.
Le nto bebeyihlele kahle ngoba baqale babhoncula amalambu akhanyisa emnyango kwase kuba mnyama emuva kokuba..