UZIFAKE ENKINGENI EKHOMBISA UKWESEKA UMANANA
UZIDALELE amazinyo abushelelezi uNgqongqoshe wezokuThuthukiswa koMphakathi, uNkz Bathabile Dlamini (osesithombeni), ngokuphawula kwakhe okuzwakale sengathi weseka iSekela-ngqongqoshe lezeMfundo ePhakeme, uMnu Mduduzi Manana.
UNkz Dlamini ucashunwe yiphephandaba eliphuma ngeSonto eveza ukuthi akakholwa wukuthi uMnu Manana kumele athathelwe izinyathelo ngokuhlasela owesifazane endaweni yobumnandi ngesonto eledlule.
Ngokusho kwaleli phephandaba, uNkz Dlamini uthe ziningi izikhulu ezingaphakathi kuhulumeni ezinamanye amacala adlula akaMnu Manana.
Lokhu kuphawula kukaNkz Dlamini kumdalele amazinyo abushelelezi emaqenjini ezepolitiki nasezinkundleni zokuxhumana.
UNkz Liezel van der Merwe weNkatha Freedom Party (IFP) - oyilunga lePhalamende - uthe kuya- caca ukuthi uNkz Dlamini usesikhohliwe isifundo sakhe njengongqongqoshe okumele abhekelele ukuvikelwa kokuhlukunyezwa kwabesifazane.
“Kumele ngabe nguyena ohamba phambili ezinhlelweni zokuvikela abesifazane. Siyadumala ngokuphawula kwakhe,” kusho uNkz Van der Merwe.
Uthe kumele uNkz Dlamini ashenxe esikhundleni sobungqongqoshe, aqhubeke nokuhola i-African National Congress Womens' League (ANCWL) kuphela.
“Uma engehli esikhundleni uNkz Dlamini, uMengameni Jacob Zuma kumele abathathele izinyathelo bobabili noMnu Manana,” kusho yena.
Izolo ngeSonto, iningi labantu libabele ezinkundleni zokuxhumana lezwakalisa ukudumala ngokuphawula kukaNkz Dlamini. Khona manjalo, ekhuluma emcimbini weANCWL obeseKurhuleni, eGauteng izolo, uNkz Dlamini uthe udaba lukaMnu Manana seluphendulwe ipolitiki njengoba sekungenelela namaqembu ekubeni ukhona umthetho.
I-Democratic Alliance (DA) izwakalise ukushaqeka ngemibiko yakamuva ngoMnu Manana, imsola ngokuthi ubehlukumeza unobhala wakhe nezinye izisebenzi zesifazane emnyangweni wakhe ngokuthi zihlanze umuzi wakhe futhi zimphekele.
“I-DA izozibika kwiKhomishana yezokuLingana ngokoBulili lezi zinsolo ukuze iziphenye kabanzi bese yenza iziphakamiso ePhalamende. Sizophinde sibikele neKhomishana yamaLungelo abaNtu ukuze kube nezinyathelo athathelwa zona,” kusho isitatimende saleli qembu.
Leli qembu liphinde lagxeka kakhulu uNkz Dlamini ngokukhombisa kwakhe ukweseka uMnu Manana.
“Kuyishwa ukuthi esikhathini samanje lapho sibhekene nokwenyuka kwesibalo sokuhlukunyezwa kwabesifazane kube nomuntu osesikhundleni sikahulumeni ongakhuluma ngale ndlela. Le nkulumo kaNkz Dlamini iyihlazo ngakho kumele axolise emphakathini. Kumele abagagule labo athi bangcole ukudlula uMnu Manana,” kuqhuba isitatimende.
I-DA idalule ukuthi ngosuku azobuyela ngalo enkantolo uMnu Manana, izohlela imashi ezohlanganisa zonke izinhlaka ezithintekayo ukuze kube nezwi eliqinile uma ithi kayihambisani nesenzo sokuhlukunyezwa kwabesifazane nezingane.