Kukhalwa ngomfundi oyingozi esikoleni
Kuthiwa uphatha isikhali nomthuzi wezinkukhu
BADLIWA yingebhe ngenxa yomfundi okubikwa ukuthi uyingozi abazali bezingane ezifunda eKuhlekwethu Primary School, eFolweni, eningizimu yeTheku njengoba kuthiwa uphatha isikhali nomthunzi wezinkukhu emagcekeni esikole.
Kubikwa ukuthi udaba lwalo mfundi - owenza uGrade 7, igama lakhe esiligodlile - selufinyelele kubaphathi besikole kodwa kazikho izinyathelo ezithathwayo ngaye yize eqhubeka nokwenza okuphambene nomthetho wesikole.
Umzali onengane efunda kulesi sikole, uthi basabela izingane zabo ezozigcina zilimala ekubeni le nto ibingalungiseka kusenesikhathi ngokuba kumiswe lo mfundi owuhlupho noma-ke kuxoxwe nabazali bakhe.
Uthi kunezingane esezibhenyiswa ngenkani insangu ezindlini zangasese esikoleni, zesabe ukubika ngoba lo mfundi uyazesabisa.
“Le ngane iyesatshwa esikoleni, kwehlula ngisho kubikwa kuthishanhloko ngale nto. Kasikaze sizwe ukuthi iyajeziswa ngoba kwayona insangu nommese lona engikhuluma ngakho kutholakale kuyona.
“Ziyasixoxela izingane ngokwenzeka esikoleni sikuthathe sikutshele othisha kodwa kungenziwa lutho. Kakusikhona okokuqala iphambana nomthetho ngoba phambilini ibiphuza nasesikoleni,” kusho lo mzali.
Uthi ukuba unyaka kawusamile kabi, ngabe bayazikhipha izingane zabo kulesi sikole ngoba kazisaphephile. Utshele leli phephandaba ukuthi lo mfundi uyaliphinda leli banga ngenxa yakho ukuhlupha esikoleni.
“Omunye wothisha uyenzile imizamo yokubuza abazali bale ngane ukuthi kungani behluleka ukuyilawula, bathi bayayesaba,” kusho umzali. Kuthiwa lo mfundi akaqondiswa izigwegwe ngoba uke wesabisa omunye uthisha wathi uzomgwaza.
Imizamo yokuthola usihlalo wesigungu esilawula isikole iphunzile njengoba ucingo lwakhe be- lungangeni.
* INkatha Freedom Party (IFP) isinxuse izinduna namakhosi ukuba bangenelele ngokukhulu ukushesha empini yabafundi baseNxusa High School eMthonjaneni, enyakatho-mpumalanga yeKwaZuluNatal esidlule nemiphefumulo yabafundi abane.
Kubikwa ukuthi kushone abafundi ababili ngoLwesine abahlaselwe kubo badutshulwa kanti kunezinsolo zokuthi ingxabano iqale emcimbini wesintu emasontweni edlule.
Kuthiwa kudutshulwe abanye ababili ngokuqala kukaNcwaba (August). Kuneminye imibiko ethi ingxabano iqale khona esikoleni.
UMnu Blessed Gwala obhekelele ezokuphepha komphakathi kwiIFP KwaZulu-Natal, uthi ingxabano edlule nemiphefumulo yabafundi ibahlukumezile.
"Siphatheke kabi kakhulu ngoba sekubikiwe ukuthi abenze lokhu sebeshilo ukuthi bayaya nakwabanye, lokho okubeka abanye ebungozini ngoba lezi zingane zihamba ngebhasi elilodwa uma ziya esikoleni,” kusho uMnu Gwala.
UMnu Mthethwa uthe UNgqongqoshe wezeMfundo KwaZuluNatal, uMnu Mthandeni Dlungwane, udlulisa amazwi enduduzo emindenini elahlekelwe eNxusa High, unxusa umphakathi ukuba usebenzisane naye ubambe iqhaza ekwakheni ukuthula esikoleni.
Okhulumela amaphoyisa KwaZulu-Natal, uColonel Thembeka Mbhele, uthi okwamanje kakukaboshwa muntu kodwa icala livuliwe eShowe, enyakatho-mpumalanga yeKwaZulu-Natal, kusalindwe imindeni ifihle bese kuqhubeka uphenyo.
“Abadutshuliwe bahlaselwe kubo ngezikhathi zakusihlwa nakuba imbangela ingakaziwa,” kusho uColonel Mbhele.
Le ngane iyesatshwa esikoleni, kwehlula ngisho kubikwa kuthishanhloko...