UMSINDO KUMISWA OLWEZINDLU
SEKUSUKE umsindo ngokumiswa kohlelo lokwakhiwa kwezindlu eMpendle, maphakathi neKwaZulu-Natal, emuva kokungaboni ngaso linye phakathi kwekhansela lakuwadi 2, uNkk Phendukile Mtolo - lolu hlelo lwezindlu olungaphansi kwalo - neqeqebana lamalunga e-African National Congress (ANC) elikhala ngokuholelwa kwezisebenzi amakinati.
Lolu hlelo lwezindlu, oseluqalile KwaShalifishi naseMbaliyezwe obeluzodlulela naseNzinga, lumile emuva kokuba amalunga e-ANC evele agasela lapho kusetshenzwa khona atshela izisebenzi ukuba ziyeke ukusebenza kuze kulunge amaholo azo.
Ngokusho kwelinye ilunga lomphakathi, esiligodlile igama lalo, umphakathi udinwe ugane unwabu ngokumiswa kwalolu hlelo njengoba lungaqali ukumiswa ngaphansi kwaleli khansela.
“Sesikhathele wumasipala wale ndawo olokhu udlala ipolitiki eshibhile, ulwa izimpi zawo ngomphakathi. Ikhansela nalaba bantu abamise lolu hlelo ngabeqembu elilodwa, kangazi ukuthi kungani bengahlali phansi balungise uqhekeko olukhona ngaphakathi kubona njengoba sekuhlukumezeka umphakathi.
“Kule ndawo kukhona abantu abangenazo ngempela izindlu, okuthi uma izulu lina bakhongo- zele imvula ngezindishi bengaphakathi endlini. Phambilini balumisile lolu hlelo bathi kabahambisani nokuqokwa komxhumanisi womphakathi nosonkontileka - obeqokwe yikhansela.
“Uma bengalifuni ikhansela labo mabalikhiphe bangalokhu belwa ngomphakathi,” kusho umthombo.
Elinye ilunga lomphakathi, uMnu Delani Khumalo, lithi laba bantu bayeka ukusebenza bashiya imigodi abayivulile ingavaliwe, osekuyingozi emfuyweni.
“Amagceke amagebhugebhu nemfuyo yethu seyiyalimala uma ingene kule migodi yezilebhu. Ezinye izitini zivele zabekwa emgwaqweni, okwenza kube nzima ukuyigada imini nobusuku. Abantu abagangile sebengayintshontsha njengoba ihleli kabi kanje kungasasetshenzwa,” kusho uMnu Khumalo.
UMnu Sadewu Ngubane, ongumxhumanisi womphakathi nosonkontileka, uthe kubaphatha kabi ukuthi ngabantu abangesiyona ingxenye yezisebenzi laba asebefaka unyawo entweni ebizothuthukisa iMpendle.
“Laba bantu abaqhamuka sebethi uhlelo lwezindlu malume, kabasebenzi kule nkontileka. Uma ungase ubabuze ukuthi baze bathi bafuna ukwenyuselwa amaholo nje bahola malini, ngeke bakutshele,” kusho uMnu Ngubane.
Uthi izisebenzi ezixova udaka kule nkontileka zihola u-R90 ngosuku bese kuthi ezibeka izitini zihole u-R120 ngosuku.
UNkk Mtolo uvumile ukuthi lumile uhlelo ngenxa yezinkinga. Wale waphetha ukwenaba ngezinkinga akhuluma ngazo wathi ngezangaphakathi. Ebuzwa ukuthi phambilini lolu hlelo belumiselweni, uvele wavala ucingo okuthe ILANGA seliphinda limthinta wangabe esalubamba.
UMnu Mzwandile Zuma, okunguyena obhekelele uhlelo lokwakhiwa kwezindlu, ucele ILANGA limnike isikhathi abuze kubaphathi bakhe ukuthi akhulume yini kwabezindaba.
Ugcine engabuyelanga kuleli phephandaba nempendulo.
IMeya yaseMpendle, uMnu Sizwe Ndlela, ithe ikuqabuka ngeLANGA ukuthi lolu hlelo lumisiwe. Ithe noma zikhona izinkinga kodwa ibingazi ukuthi sezize zenza ukuba kume uhlelo lwezindlu.
“Mina ngazi ukuthi zixazululwa kusetshenzwa. Ngisazoxhumana nezinhlaka ezithintekayo ukuthola umbiko ogcwele ngalolu daba. Siwumasipala ngeke sikuvumele ukuphazamiseka kohlelo lwezindlu njengoba kuyilungelo labo abantu elikumthethosisekelo ukuba nompheme onesithunzi, ovikelekile wokufihla amakhanda,” kubeka uMnu Ndlela.
thandeka.ngobese@ilanganews. co.za