Obaba mabakhulise ngendlela amadodana
I-VIDEO esabalele ezinkundleni zokuxhumana lapho umfundi wesilisa ebonakala ekhombisa ubuqhwaga ekhahlela owesifazane waze wopha, iyethusa. Lokhu kwenza sibuke indlela isizwe sethu esinolaka nentukuthelo ngayo - okungenye yezinto esibona zinomthelela ekuhlukumezeni - izolibhubhisa izwe.
Inzondo nentukuthelo ebonakala emazwini abantu abasuke bephendulana ezinkundleni zokuxhumana, ikhombisa ukuthi sekushoda indwangu nje ezokokhelwa beseliqhuma njalo leli bhomu.
Indlela lo mfana akhahlela ngayo intombazane ikhombisa ukuthi le ntukuthelo esiyibona ezinkundleni zokuxhumana - ikhona nasemakhaya, ikapakela nasezinganeni.
Yize izingane zifunda ukungcola okuningi ngaphandle kodwa ngokwesintu umfana uyijoka likayise, uma ekhulele koninalume bakhona oninalume, kumele kube yibona abamfundisayo ukuthi ukuze akhule abe yindoda kumele aziphathe kanjani. Kasimbopheli ogodweni uyise walo mfana njengoba nakhu uze wamqhuba wamyisa emaphoyiseni kodwa esikushoyo wukuthi kufanele obaba baqinisekise ukuthi amadodana abo ayazi ukuthi abesifazane baphathwa kanjani.
Lokho-ke bazokufunda ngokubona indlela oyise abaphatha ngayo onina noyisekazi. Yize kunjalo, kunabesifazane abangamadoda oqobo, abakwazi ukukhulisa amadodana abo - oyise bawo bengekho - abe ngamadoda angempela.
Kwakhona-ke nje ukuthi owesifazane aze akhulise ingane yedwa kodwa uyise esebenza, ekhonjwa laphaya ngaphesheya komfula, sekumele uhulumeni uqinise isandla baboshwe. Nokho-ke ngeke sabheka lo mfana kuphela, uMnu Mduduzi Manana - oyisekelangqongqoshe kwezemfundo ephezulu - noMnu Shaka Sisulu ongumzukulu kaMnu Walter Sisulu yibona okufanele babeyisibonelo ebafaneni abancane kodwa nabo basolwa ngento efanayo yokushaya abesifazane.
Siyezwa nje kukhona ababuzayo ukuthi lona wesifazane oshaywe nguMnu Manana ubemeyiselani emubiza ngesitabane.
Kuyasidida lokho ngoba kasicabangi ukuthi umuntu usengaze akhwelele omunye ngenduku ngenxa yokuthi ubizwe ngesitabane - ngaphandle-ke uma eyisona ngempela kodwa engafuni ukwaziwa. Abesilisa asebekhulile mababe yisibonelo kubafana abasakhula, kungakhathalekile ukuthi ingane kakuyona eyakwakho.
Uma sekungabantu abadumile futhi abangabaholi abazophambana nokulunga, balindele ukuthi intsha yenzenjani?
Ingani indlela ibuzwa kwabaphambili. Uma intsha ikhonjiswa ukuthi abesifazane yizigubhu nje zokusinisa izangoma, nayo izokhula yazi lokho - ibashaye njengoba kwenza abaphambi kwayo. Ngeke siphele-ke lesi sihlava uma ngabe kunabantu okuzothi beshaye abesifazane kubuzwe ukuthi bona bebenzeni baze bashaywe.
Ukuba bekungumuntu omhlophe nje lo obeshaye le ntombazane eshaywe nguMnu Manana, kasicabangi ukuthi ibizobuzwa eyokuthi yena ubenzeni, bekuzokhulunywa eyebala.
Ake siyeke ukuyikaka lapho ingalele ngakhona bakwethu. Ukuhlukumeza kuwukuhlukumeza nje, yindoda engazethembi kuphela ebona ukushaya owesifazane kuyinqumo sokugcina kwenazo emgodlagodleni wayo.
Siyazi ukuthi abesifazane kwesinye isikhathi bake benze noma basho izinto ezinyuselana ngoshukela kodwa indoda yangempela iyazi ukuthi ukuqagulisana naye kakusizi ngalutho, kasisayiphathi-ke eyokuzithela ngechilo umshaye!
Uma sekungabantu abadumile abaphambana nokulunga, intsha yona?