UNKULUNKULU AKAKWETHEMBISI ISINKWA KODWA AKUNIKEZE ITSHE
UNKULUNKULU uvame ukuhamba ngaphambi kwethu asixazulele izinkinga ezingakenzeki. Isikhathi esiningi siyaye sizincome thina, sicabange ukuthi kuwukuhlakanipha kwethu.
Ukwenzile lokho kubantwana bakwaIsrael wahamba ngaphambi kwabo ebanqobela izizwe ezabe zakhe ezweni ayebathembise lona. Bona kabakubonanga lokho, bakhala ngokuthi bazibona beyizintethe.
Kuba yinkinga uma uJehova ekunika into wena ubone ingakufanele. Bakhohlwa wukuthi kakusibo abathembise uNkulunkulu lelo lizwe lesethembiso. Uma uNkulunkulu ekuthembise into, wenza isiqiniseko sokuthi uyayithola. Uyakwazi uNkulunkulu ukubeka abantu abathile abazoba wusizo kuwena. Ngelinye ilanga uShembe ezihambela wahlangana nomfana ephethe inkawu. Ngenxa yokuthi uShembe uyakwazi ukukhuluma nezilwane, ngisho izihlahla imbala, inkawu yayivele isikhulumile naye.
UShembe wambuza umfana ukuthi ufuna malini ngengane yenkawu. Umfana wathi ufuna u-50c. Wamnika leyo mali wathi makayibuyisele kunina. 1 Shembe ndodana kaMayekisa Ngihawukele mina Yasho njalo inkawu encane Ezodlula ngakubona. 2 Yathi Mkhululi weziboshwa Uyokhulula abanjani Ngimshiyile ubaba nomame Angazi la ngiya khona. Okwethusayo lapha, inkawu iyambona uShembe ukuthi ungumkhululi. Ukuze ithole usizo inkawu, uNkulunkulu wasebenzisa uShembe. Kakubanga nje wukuqondana kwezinto. Konke kwakuyicebo likaJehova.
Kakukho okwenzeka ngephutha kuNkulunkulu konke usuke esekulungisele. Ivesi lesi-6 lithi: Vukani sekusile Nizovuka nini Naze nedlulwa yizinkawu Ngokuyibona inkosi. UShembe uyinkosi yamakhosi nakhu nezilwane ziyafakaza ngaye. Ngiyayithanda incwadi kaDeuteronomy 9:3-4, ithi “Yazi-ke namuhla ukuthi uJe- hova uNkulunkulu wakho unguyena owela ngaphambi kwakho njengomlilo oqedayo, uyakubachitha, abanqobe, wena ubaxoshe ubabhubhise masinyane.” Kwakukuncane kabi okwasekufanele kwenziwe ngabantwana bakwaIsrael.
UNkulunkulu uthi usebanqobile bona sekufanele babaxoshe futhi bebabhubhise masinyane. Ngokungamethembi uJehova phezu kwezinto ayesebenzele zona kwagcina kubathatha iminyaka engama-40 bezula ehlane.
UNkulunkulu wacela uMoses ukuba athumele izinhloli ngezwe ayelithembise abakwa-Israel. Kepha kubantu abali12, babili kuphela abakholwa wukuthi banamandla okulidla leliya lizwe.
KuNumeri /Imibhalo 13:2 7-33, kuthiwa: Kepha amadoda ayenyuke naye athi : “Asinakwenyuka sihlasele labo bantu ngoba banamandla kunathi. Sabona khona iziqhwaga, amadodana ka-Anaki avela eziqhwageni, emehlweni ethu saba njengezintethe, saba njalo nasemehlweni abo”.
Inkinga esinayo thina bantu yileyo
yokuzibona singelutho noma uJehova esesinqobele izimpi, kepha sizibone siyizintethe. Yilokho-ke okuvimba uNkulunkulu ukuba asibusise ngokukhulu. UNkulunkulu uthume uShembe kithina ma-Afrika kodwa insila yokuzenyeza kayiphumi lapha kithina, sincamela ukukholwa ngokwabezizwe, okwethu sikubize ngobumnyama. Empeleni sonke sinezinto ezisehlelayo, okuze kube sengathi ngeke zisalunga. Okuhle wukuthi uJehova uhamba ngaphambi kwethu ukusinqobela izitha nokugudluza imigoqo esivimbela ukufika empumelelweni.
Abafundi bakaJesu bayambuza ukuthi ngabe yisono sikabani lesi njengoba engaboni nje, uyabaphendula uJesu uthi kakucala lamuntu, kepha uJehova ufuna ukukhazimulisa indodana yakhe. Niyabona-ke, uNkulunkulu wahamba ngaphambi kukaJesu ukuyodala umuntu okhubazekile ukuze udumo lunikwe indodana.
Mhlawumbe kunabantu osubanukela njengeqaqa mntwana kaNkulunkulu, kodwa ngifuna ukukutshela ukuthi konke kuyicebo likaJehova ngoba yena usehambe ngaphambi kwakho ukuyogudluza abantu abangafanele empilweni yakho. Kubanjalo kubantu othemba labo likuJehova.
UNkulunkulu ngeke agcina ngokubagudluza nje kuphela kepha uyokubusisa ngokuphindiwe kwabakwenze okubi. Uyakwazi uJehova ukuba nezixazululo ezinkingeni esingakaziboni.
Ngesikhathi uShembe ezwa ukuthi ngeke ebuye ephila eNtabeni iNhlangakazi ngoba kukhona izilwane eziyingozi, waphindela eNtabazwe, kodwa izwi lathi makabuyele eNhlangakazi. Yini le eyenza uNkulunkulu amphindisele entabeni uShembe?
Yingoba uJehova wayesehambe ngaphambili, wasusa zonke izilwane eziyingozi ukuze uShembe ayokwamukela uMoya oNgcwele phezu kwentaba.
UNkulunkulu uma efuna ukusebenza ngawe uzoke asuse abantu abasondelene nawe ngoba ebona ukuthi bazoba yizithiyo.
Ngesikhathi uJehova efuna ukwembatha uShembe ngokuphelele, wamnx- usa ukuba ashiye amakhosikazi akhe. Ayengone lutho amakhosikazi ka-Shembe kodwa uNkulunkulu wabona ukuthi ngeke akwazi ukumsebenzisa engawashiyile. Masikhumbule ukuthi uShembe uzalwa yintombi yakwaHadebe nje wayevele eyisiphrofetho. UNkulunkulu wayengamsebenzisa uShembe engakaganwa, kodwa ngoba wayefuna ukuba azale isizwe esiyoqhubeka nokuhola ibandla lakhe, wamyeka waze waganwa.
Sengiphetha nje, ngizothatha incwadi ka-Isaiah 45:2, ithi: “Mina ngiyamuhamba ngaphambi kwakho, ngihlelembe amagebhugebhu, ngephule izivalo zethusi nginqume imigoqo yensimbi.” Uma uJehova enza isethembiso uyasigcina ngoba uthembekile. Nanamuhla usahamba ngaphambi kwethu usigudluzela izithiyo, usichobozela nezitha ebesingeke sikwazi ukuzinqoba. Makabongwe uJehova Amen