Kusengwa ezimithinyo ngoHarry Gwala
MHLELI: Uthe ekhuluma eCurries Fountain uMphephethe wathi: “Sizwile ukuthi amaBhunu anohlu lwabantu azobabulala. KunoSbu Ndebele, azombulala ngempela amaBhunu ngoba uyigwala, uzalwa ngumfundisi. Kunegama likaMatthew Phosa - kawadlali la maBhunu - bese kuba nelikaHarry Gwala.
Adakiwe la maBhunu, sizowashonisa emgodini eMgungundlovu.” Kuthe kufika iqabane elalikwazi ukuthaka amakhathakhatha, uBhampetsheni, ngabo-7 ekuseni uMphephethe wathi: “Mdala, kuthiwa thina sobabili sizobulawa”, abone umntomdala ukuthi usenga ezimithiyo lo, athi “ukuze ku-ngashiwo ukuthi kutholakale abaholi be-African National Congress (ANC) befe ndawonye, phindela kwakho bakubulale kwakho nami bangibulale kwami.” KwiCodesa, uMnu Frederick W de Klerk, ucele ukukhuluma ekugcineni kanti ufuna ukugxeka i-ANC. Agane unwabu uMnu Nelson Mandela, asukume “anyathele” uMnu de Klerk, kube muncu.
Kalijabulanga kanje iBhubesi (uMnu Gwala), lathi: “Nangu uMandela esimaziyo”. Wanama waze wafonela uMnuz Water Sisulu. Nangesikhathi amaqabane amaNdiya emthengele iMercedes Benz endala wethula inkulumo ezihlweleni wathi: “Kunabasithengele izimoto kodwa masizabalaze”.
Namuhla amaqabane kawenzisi okukaMphephethe, kawasabiki uma enezipho aziphiwe, yiwona afuna “okweshumi”. KwaMakhutha, wayehamba noMnu Sisulu, wacela kubekwe izikhali phansi. Isukume-ke ingonyama kaKhongolose ithi: “Ngaphambi kokuthi sizibeke phansi izikhali, sinikeni zona kuqala”. Nangesikhathi ibambene e-Edendale, kwehla uXhamela ehamba noMnu Mosioua “Terror” Lekota, wathi uMnu Lekota:
“Makungayiwa lapho ibambene khona”, kanti lizothukuthela iBhubesi lithi: “Cha, abaholi mabafe nabantu, mayiye khona maqabane.” Ezobonwa yintsha eyayisanda kuphuma ejele ngowe-1988, usebuza-ke ukuthi: “Nizimisele ukufela inkululeko?” nebala ivume intsha ngomdlandla bese esho into eyayingalindelwe muntu athi: “Mina ngeke ngiyifele inkululeko, ngingayibulalela.” Kwafika uMnu Gumede beyoxoxa ngamasu ngezingxoxo neNkatha Freedom Party (IFP), bese beya eGoli. Bavumelana nekomkhulu ukuthi zizoqhutshwa kanjani izingxoxo bese ethi: “Uyabona-ke Wolly (Mnu Sisulu), nigqoke amasudi amakhulu ngoba uma niphuma emhlanganweni ningavumelananga ngokuthi “power to the people” (amandla kubantu) kuyoqhuma isigwagwagwa, kuyofanele nikwazi ukubaleka ngoba niyothelwa ngamachaphazelo.” Okucacisa ukuthi akakaze aphikisane noxolo nokuthula uMphephethe.