KUKUMUNTU UKUZEHLUKANISELA NGENKOLO
MHLELI: Ngicela imvume ngiphawule ngencwadi uSenzo kaKhakhayi Mbatha abephendula kuyona uDkt Sipho Buthelezi wasePinetown eshicilelwe mhla zingama 27-29 kuNtulikazi (July) kuwona lo nyaka ngaphansi kwesihloko “Ngicacisa ekaShembe noNkulunkulu.” Kunezinto umbhali wendaba azibalulile echaza, enikeza izimpendulo kulo abemphendula nami engifisa ukucacisa okuthile ngazo, mhleli. Umbhali uqala ngokuvuma ukuthi uShembe akalingani noNkulunkulu, lokho-ke kuhle nami ngiyavumelana naye kepha kukhona lapho ecaphune khona isihlabelelo samaNazaretha 5, athi sabhalwa nguMqaliwendlela. Uthi umbhali wendaba isihlabelelo sithi “abafuna ukumkhonza uJesu mabamlandele bageze izingubo zabo zibe mhlophe qwa egazini lakhe elasifela esiphambanweni.”
Ngicela ukukulungisa okushiwo yisihlabelelo samaNazaretha uma kuya ngokuthi sisho njalo njengoba echazile uMbatha. Igazi likaJesu kaligezi izingubo zabantu zibemhlophe kodwa lihlambulula unembeza womuntu.
NgokwamaHeberu 9:14 “Kakhulu kangakanani igazi likaKristu owazinikela kuNkulunkulu ngomoya ophakade engenacala, lizohlanza unembeza wethu emisebenzini efileyo, ukuze sikhonze uNkulunkulu ophilayo.”
Okunye okumqoka yilapho umlobi ethe khona uhabulisa lona abemphendula wabe esechaza ukuthi uShembe wazalwa kanjani, wangena ezintweni othi uma uzizwa kube sengathi lo obhalayo uthi uJesu noShembe kuyena bayalingana noma engaphumelanga obala.
Lokho-ke kube sekuphikisana nathe kushiwo yisihlabelelo samaNazaretha. UMbatha uzwakala emphikisa uDkt Buthelezi owathi uShembe wazalwa ngokwenyama noma ngokwemvelo ngoba umbhali uchaza ngembali eyayinuka kamnandi eyayiwumoya ongcwele eyadliwa nguSitheya wakwaHadebe.
Emuva kokuyidla kwakhe kwase kubanezwi elakhulumayo. Ngingakasho lutho nje ngezwi elakhulumayo, ngifisa ukudlula kulena yembali engumoya ongcwele, ngithi ukuzalwa kukaShembe makungafaniswa nokuzalwa kweNkosi uJesu ngoba kuJesu kwakhuluma ingelosi kuMariya kanti kuShembe nguSitheya owadla imbali kwakhuluma nezwi.
Uma ungajula lapho uyabona ukuthi vele laba bantu sebebekwa ebuNkulunkulwini bebe bezelwe ngokwehlukile ngoba onina babo bagcwaliswa ngumoya ongcwele bobabili.
Ngeke ngikhulume kakhulu ngezwi elazwiwa nguSitheya ngoba maningi amaphimbo akhulumayo kulo mhlaba, nanamuhla asakhuluma kodwa okwashiwo yilelo lizwi yikhona okwenza ziqine izinsolo zokuthi sengathi kunemizamo yokubeka iNkosi uJesu noShembe ezingeni elilodwa lobuNkulunkulu.
Igama umoya ongcwele lisho uNkulunkulu ophelele ongeke aphiwe elinye igama. UnguNkukunkulu uyise, uNkulunkulu indodana noNkulunkulu uMoya Ongcwele, okunye kakukho. Kuphinde kuzanywe ukuqhathanisa uJesu noShembe ngokokufa nokuvuka njengoba uMbatha echaza ethi noShembe wafa waphinde wavuka.
Uyakubona njalo lokho kuqhathanisa nokuzama ukulinganisa laba bantu ababili abangalingani, abangafani nokungelula ukuba bafane noma balingane? UShembe waphaphama sekumbiwe ithuna, ngokusho kombhali. Uma ungabuka ukufa kwabo bobabili ukuthi omunye wafelani nomunye wafelani nokuthi ukuvuka kwabo bobabili kusho ukuthini ungakhexa umlomo. Uthi umlobi wendaba uShembe kwathi eguqile ethandaza wathathwa nguMdali eyomkhombisa imfihlakalo yasezulwini eyomnika namandla okusindisa nokuphilisa.
Ngelinye ilanga uyosichazela umkhaya wami thina esazi ukusindiswa okukodwa okukhona uNkulunkulu akunika uJesu ukuthi alenge emthini asindise abantu ezonweni zabo. Uthi umbhali uShembe kunamatshe awabeka benoyise wakhe (uNkulunkulu). Nalokho kumbeka kummise ncamashi noJesu.
Lawo mazwi akhulunywa nguJesu ebiza uNkulunkulu ngoyise, ezenza olingana noNkulunkulu ngoba vele unguNkulunkulu. Izimpawu ezivezwa ngumlobi wale ndaba zikhomba ukuthi noShembe unobuNkulunkulu uma kanti ngesikhathi kudalwa umhlaba wayekhona. Kasazi mhleli kukumuntu nomuntu ukuthi azehlukanisele. ISAZISO: ILANGA likhuthaza inkulumompikiswano evulelekile ngezenkolo, wusikompilo lwesintu, imikhuba nezinkolelo ukuze lowo nalowo athekele eshungwini lomunye, kufundiswane kuthuthuke isizwe. Kulokho kuphikisana, sicela kugadlwe ngamaphuzu kudliselwane ogageni nangokuphusa kwamaphuzu, kungachukuluzwana noma kubukelwe phansi ezinye izinkolo. Sicela niqhubeke nibhale ninothise isizwe ngolwazi ukuze umuntu ezozikhethela indlela afisa ukuyilandela. ~Umhleli