NIZOPHELELWA WUMSOCO NIHUBHANA NOJAKHOBE
OKWAMAQEMBU aphikisayo eMany Cannibals Afrika okwezandla, ukuba ngokwezinyawo ngabe kungenela iCongress Malathon.
Kawaboni nje ukuthi athungatha izindoni esihlahleni sikagamthilini - futhi zibe zi- out of season - njengoba ezama ukukhipha uMengameli Jakhobe Surprise esikhundleni? Asezama nalokhu okuthiwa yi- impeachment emuva kokwehluleka evotini lokutshela izwe ukuthi ubaba kaDuduzani akayena uThembekile, unguGedleyincokolisa!
We maqembu aphikisayo, uma nicabanga le ndoda evele isukume ephalamende - ekula mabhentshi asemuva - eyi- comedian, engenqeni ukuvele ithi: “Point of order madam speaker… akuthina esabulala uVan Damme” ingavota nje ukuba kuhlakazwe iphalamende?
Ngeke ngisho senikhala izinyembezi zika- petrol ngoba izophelelwa yitoho kanti vele ngeke ilunge emkhakheni wamahlaya angempela, ilunge iwashaya khona laphaya ephalamende. Mina nje bengizowacebisa amaqembu aphikisayo ukuba ayeke ukumosha imali elokhu ehubhana notalagu, mawathathe le mali agijima ngayo ezinkantolo ayinike u-Edmund Mhlongo weK-Cap laphaya KwaMashu ngakubo kaSiyabonga “Bhele” Nomvethe abhale umdlalo weshashalazi othi “Amagwala” aqashe izingane zilingise - problem solved, kwanda amatoho. Protagonist: Mmusi Maimane; Antagonist Jakhobe Surprise etc. Amazwibela:
Kwahlanganwa-ke ehhovisi lapho kuhlanganela khona ikhokhasi kaCongoloose. Isimo sasishubile impela. Wangena umengameli esewabuka ngenhla kwezibuko wonke amalunga eNEC ayelapho. Wathi ukuthi qalaqala. Wedadewethu Bajabulile, uphi uPhalafini? Usayoncetheza wena mhlonishwa mengameli nalaba belungu beWMC… Kuyini-ke lokho, yinhlangano yomama abathungayo? (Sakuhleba) Awubheke nje, umuntu akazi nokuthi yini iWMC kodwa nguyena ohlale…
Ndikuvile njalo wena suicide bomber… ndizamxelel’ umhlonishw’ utat’ mongameli…
Injalo nje, amaqembu aphikisayo nawo azoze aphelelwe wushukela njengoshingamu uma ezolokhu ehubhana nomhlonishwa, uyise kaNtashinga. Siyazi ukuthi sisenkingeni yezomnotho etc kodwa nawo asezozibangela isigcwagcwa ngokuhubhana nomengameli.
Ngoba ngithi amaqembu aphikisayo amaningi anabantu abazi isiNgisi futhi iDA yona kakhulu inabelungu abazalwa isiNgisi sibhalwe ezindongeni emakubo - kungafani neningi lethu elizalwa ezindongeni kulengiswe amahluzo/amavovo - kawazi yini ukuthi silence is golden? Mawathule vele i-African National Chordless iyadunguzela.
Yize ngizalwa yiShangane neChunu, ngiyikhaladi, kodwa KwaDlangezwa - lapho isiZulu sikhishwa khona ngogovane - kuye kuthiwe ungamshayi umuntu egula ngoba ngeke uchonywe uphaphe lwegwalagwala. Amaqemu aphikisayo-ke mawayeke ukufana nenkampani yakwaCoca Cola ekhangisa ngisho iCoke iphuzwa nge- breakfast, lantshi nangendlakusihlwa.
Ukulandelana nobaba kaNta- shinga kuzokwenza ukuba nawo aphelelwe wumsoco ngoba abantu abangazi ukuthi irandi liwa uma kunjani, bazosho njengomunye ungqongqoshe bathi bazolicosha noma lingayokhalakathela phakathi emgodini wasemayini ligqibeke.”
Bazobona emsukela nje ubaba kaNtashinga weNkosi… kangisho njalo ukuthi akasukelwa.
Amaqembu aphikisayo - ikakhulukazi iDA - kumele athathe iziyalo zikaRev Mkhekhelezi, mawalinde ukhetho ngonyaka wezi-2019 angaphangi umdaka libe likhipa uSathane esihogweni - amalunga ephalamende e-ANC, abona izinto zihamba kahle eMany Cannibals Africa makungathi-ke uma sekuphethe omunye umengameli kwi-ANC emuva kukaZibandlela (December) siwezwe esethi uyise kaNtashinga wayenje waba nje, waphinde waba nje ngoba esencenge izikhundla ngoba ayozisola esewodwa endlini e- small - kwapolitiki kakudlalwa umas’gco-zi. Hikhensile ngopfu ma-Afrika!