ZISHO NTANGAYAMASHINGA:
UYAYIBONA inqubekela phambili emculweni nakuba bekukhona abebewungabaza ushuni awudlalayo ngesikhathi efika emculweni kodwa namhlanje sebeyawuthokozela.
UMcebo Mncwango (30) waseZingweni, eVryheid, enyakatho yeKwaZulu-Natal, uthi nakuba bekhala abaculi abaningi ngokungathengwa komculo kodwa owakhe uyahamba ngoba uzibambela mathupha - awuhambise emphakathini ayozikhangisa kubathandi bawo.
Le nsizwa iyaziwa ngisho emicimbini yomasikandi. Kawusikhaleli isikhathi sakho uma kunandisa yona ngoba iyayazi into eyenzayo. Ikhono lokujabulisa abantu libuzwa kuyo kanti nezinsizwa ekhahlela nazo esiteji ziyazimisela. ILANGA likupha umlando omncane wale nsizwa nezihasho zayo. Uma izihasha isho kanje: “Ugencegence ematrogweni umfazi wezimu, Udwendwe lukaKoto isilomo saMancwango, Imbuzi encane abayibeke amaba la Yaphuma ingenamyocu. Usbhamu esodubula mina Siyobe sinenhlanhla”. Ngokomlando wezihasho zakhe uMcebo uthi phambilini ubelusile ehlathini kanti kukhona izinsizwa ezimbili ebezifuna ukuntshontsha le mfuyo, walwa kwacishe kwanqamuka izandla ngoba lezi zinsizwa bezizama ukumsoconga ngocelemba ukuze ziqede nya ngobufakazi.
“Bengisehlathini eduze nalapho kudlula khona izitimela ngasematrogweni, okuyilapho ngaphe-nduka khona umfazi wezimu ngo-ba kwase kucacile ukuthi igazi lizochitheka,” kusho uMcebo.
Uthi uzibiza ngodwendwe lukaKoto ngoba yena uzifanisa nento engapheli kwazise bekukhona abomndeni wakhe nabanye abasemaceleni abebethi kuzoshabalala ngaleli khono lomculo.
Bebekale ngisho izinyanga ezithile ukuthi ngeke ziphele esayibambile emculweni. Utshele leli phephandaba ukuthi kakuphelelanga lapho ngoba ugcine esebekwa namabala kwabakhona nabazama ukumdubula ngesikhathi sebebona ukuthi uyaqhubekeka.
Yingakho ethi siyobe sinenhlanhla isibhamu esiyodubula yena ngoba sike sehluleka. UMcebo ubenothando lomculo we- rhythm and blues kodwa uthando lukamasikandi lusanda kumvukela nakuba ebeyigagu, kwaziwa nangakubo kodwa ubengakubekile kakhulu engqondweni ukuthi uzocula.
Uphothule umatikuletsheni ngonyaka wezi-2005 eFilidi High School walibangisa eThekwini College ngomnyaka olandelayo eyozama ukuqhubeka nesigaba sobuthishela kodwa kwangenzeka ngenxa yokushoda kwamaphuzu abefuneka ekolishi.
Uthi ukunokuba abuyele kubo, unqume ukufuna amatoho eThekwini ngoba ubesazi isimo sasemuva lapho eqhamuka khona. Ujoyine iqembu lomculo iNgwe Emabala ngoba elibone lenza kahle eThekwini kanti uzokwehlelwa yinhlanhla athole umsebenzi eNando’s khona eThekwini waze wathola nemali yokuthenga isigingci.
Uthi usebenzile khona futhi ewusizo kakhulu ngoba bekunandisa yena nasemsebenzini uma kunemicimbi ngaphakathi.
“Ngithole lesi sigingci ngasisetha ushuni kaShwi nokaKwakhe Mgqumeni Khumalo, ngaqala ngapatanisa kwaze kwalunga kwagcina sekukhala into ezwakalayo.
“Ngowezi-2009 ngishiye phansi itoho ngabuyela ekhaya ngayozinikeza isikhathi sokucabanga ukuthi lo mculo ngeke yini ngiphile ngawo.
“Kuthe ngowezi-2010 ngaqopha i- demo enezingoma ezintathu ngaqala nganandisa ngasekhaya uma kwenziwa imicimbi. Langa limbe ngiqondane noPhuzekhemisi kweminye yawo.
“Ngiyishayile ingoma nami ngingazelele lutho, wavele wathatha umbhobho uPhuzekhemisi wathi lo mfana kusukela manje ngiyamsiza ngeke aphinde akoqozise ehlathini.
“Kangikholwanga ngizwa lawo mazwi, ngivele ngawa bhu phansi esiteji sengibona ukuthi saphumelela ngempela isifiso sami. UPhuzekhemisi uthe ngoba yena uya phesheya ngaleso sikhathi, uzongishiya komunye ubaba asebenzisana naye ukuze asale engisiza. Lowo baba uvele wafuna imali enkulu kwabhuntsha kanjalo,” kusho uMcebo.
Uthi ngokuhamba kwesikhathi udibane noMnu Sandile Shange ombone enandisa emcimbini ngayo i- demo. UMnu Shange lo onamakhamera okushutha ama- video, ucele ukumshutha ingoma eyodwa. Uthi leyo ngoma uyithathe wayihambisa ohlelweni uGubhu Lwami kwi-1KZNTV yafike yadlalwa kumabonakude kanti idlala nje, isikhulu senkampani yomculo, sibukele uhlelo.
“Ngithole ucingo ngifonelwa kuGubhu Lwami kwathiwa kunesikhulu ebesifikile sizongifuna sathi sichazekile sibuka ingoma yami kumabonakude nganikezwa inombolo yaso. Ngisifonelile ngathola ukuthi nguMnu Velanto Thwala ophethe inkampani yaMabunjwa Records wathi mangiye eGoli.
“Ngifike ehle- li ehhovisi neMfezemnyama ngabanikeza i- demo yami yalalelwa wathi uyangithatha kwakubhukhwa isitudiyo ngavele ngadideka ingqondo phela ngangingazitsheli ukuthi ngelinye ilanga ngingasebenza nabantu abadumile.
“Ubaba uThwala uwenzile umehluko empilweni yami nasemndenini wonke,” kusho uMcebo. Uyikhiphile i-albhamu yakhe yokuqala ethi “Ngiqome Ntombi” ngowezi-2014.
Uthi emuva kokuphuma kwayo, ucele ukuba inkampani imgayele amakhophi ayi-1000 kuphela ngoba ubengafuni umculo uduve kwazise ubesemusha engaziwa.
Uveze ukuthi uqale lapho wagcwala emigwaqweni yaseGoli ezipromotha, athengwa wonke amakhophi wabe esethatha imali wayibuyisela enka- mpanini.
Uthi ugcine esethenga nemoto wanquma ukuhlala kubo ukuze ezothola imicimbi. Nyakenye ukhiphe i-albhamu ethi “uThule Uthini” okuyiyona ngempela emphakamisile kanti njengamanje usezinhlelweni zokudedela enye.