UPienaar uphawula ngezinga lePSL
AKAWUVALI umlomo ngebhola laseNingizimu Afrika uSteven “Schillo” Pienaar (35) osanda kusayiniswa yiBidvest Wits.
IWits idlulele kwi- semi-final yeMTN8 iguqisa iLamontville Golden Arrows ngo-4-3 wamaphenathi ngoLwesihlanu kusihlwa eBidvest Stadium, eGoli. Lo mdlalo uphele zibambene ngo-2-2. Ube neziwombe ezinzima njengoba kugcine kukhishwe amakhadi ayisi-6 abomvu.
Kwi-Arrows kukhishwe uDanny Phiri, uSiyabonga Dube nabaqeqeshi bayo bobabili uClinton Larsen nomsizi wakhe uMandla “Mhloli” Ncikazi. KwiWits ku- khishwe uSlavko Damjanovic odlala emuva noGavin Hunt ongumqeqeshi.
UPienaar ugijime umdlalo wakhe wokuqala njengoba eshaye ibuya kwiPremier Soccer League (PSL) emuva kokuhlala iminyaka eli-16 e-Europe.
“Kube nzima ngisuka ebhentshini ngoba bese nginesikhathi eside ngigcine ukudlala kuleli. Ibhola lalapha selikhule ngendlela eyisimanga linjalo nje liyashesha. Nabadlali bakhombisa ukuqeqeshwa ngokweqophelo eliphezulu, abazenzeli umathanda.
“Nokho ngiyakukhuthaza ukuthi abadlali bakuleli bakulwele ukuyodlala phesheya. Ngaphandle kwemali yakhona econsisa amathe, kukhulu abangakuzuza phesheya. Phesheya ibhola liyaphilwa, ungazuza okuningi okungabuye kusize iligi yethu neBafana Bafana ngokunjalo,” kusho uPienaar.
Uthi kumjabulisile ukushaya ibuya ngewini. UPienaar ushaye enye yamaphenathi ebe seqophelweni eliphezulu.
“Bengimincile ukuthi ngingabingelelwa ngesibhaxu. Ngesikhathi i-Arrows ihamba phambili ngo-2-0 bese ngililahlile ithemba ngoba kuvele kwaphuma nomdlali wethu ngekhadi elibomvu. Ingijabulisile indlela engibuye ngayo ekhaya. Ngiyethemba ukuthi kukhulu engizokucobelela abalingani bami ngengikufunde e-Europe,” kusho uPienaar.