KUBHUNGWE NGEYOKHETHO LWE-SASFA KWEYE-COKE
KUZOCACA emasontweni amabili ezayo ngosuku lokukhethwa kobuholi obusha beSouth African Schools Football Association (Sasfa) KwaZuluNatal.
Lokhu kutshelwe ILANGA nguSmanga Mgenge ongunobhala wale nhlangano esifundazweni. Ubuholi obukhona sebuphelelwe yisikhathi njengoba kumele kukhethwe obusha ngaphambi kokuphela kwalo nyaka.
“Sibambe umhlangano ekuseni ngoMgqibelo ngaphambi kokuqala kwemidlalo yeCopa Coca Cola U/15 eCato Manor. Sivumelene ngokuthi kuzomele sikhiphe usuku lokuhlala komhlangano wokukhetha ubuholi obusha emasontweni amabili ezayo.
Siphinde sabhunga kabanzi ngokuqhubeka ebuholini bukazwelonke njengoba kukhona abaholi abamisiwe enhlanganweni.
Bekumele ngizochazela ubuholi besifundazwe ngakho konke lokhu ngoba kabukaze butshelwe. Bekumele ngethule umbiko ngesinqumo senkantolo ngodaba oluphakathi kweSasfa neSouth African Football Association (Safa),” kusho uMgenge.
Uthi sebelungiselela umhla- ngano waminyaka yonke weSasfa kuzwelonke ozokuba mhla ziyisi-7 kuMfumfu (October) kophezulu eGoli.
IJL Dube yaKwaMashu ngaphansi kwePinetown District yiyona ezomela iKwaZulu-Natal emidlalweni kazwelonke yeCoca Cola ezoqala mhla zingama-26 isongwe zingama-30 kuMandulo (September) eBloemfontein.
Lesi sikole sihlule iSenzangakhona yaseZululand ngo-2-0 kowamanqamu. I-JL Dube ingene kowamanqamu ngokuhlula iZashuke yaseHarry Gwala ngo-1-0 kanti iSenzangakhona iwashise ijezi iZama yasemaJuba.