Akayingeni eyokwesula kwiChiefs
Usebeke ithemba kumgadli wase-Argentina ngamagoli
BAMFUNA ehambile abalandeli beKaizer Chiefs uSteve “Mphathi” Komphela ( osesithombeni) ongumqeqeshi wale kilabhu njengoba bekholwa wukuthi akanayo sidalwa inhlanhla yokunqoba izinkomishi.
IChiefs iguqiswe yiSuperSport United ngo-1-0 kwi-quarter-final yeMTN8 ngoMgqibelo ebusuku eMoses Mabhida Stadium, eThekwini. Igoli okunqobe ngalo iSuperSport livalelwe enethini nguJeremy Brockie. Ukuphuma kweChiefs kulo mqhudelwano kushiye abalandeli bayo bephatheke kabi kwazise le kilabhu sekuphele amasizini amabili inganqobi nkomishi ngaphansi kwePremier Soccer League (PSL).
Bebelibeka ngesihloko elokuthi uKomphela makahambe ngoba akanayo inhlanhla yezinkomishi. Bebethi uma iChiefs iqhubeka nalo mqeqeshi kuyacaca ukuthi ngeke inqobe lutho nangale sizini. Kuzokhumbuleka ukuthi uKomphela akakaze anqobe nkomishi ehloniphekile selokhu aqala ukuqeqesha.
Lo mqeqeshi ukhale ngamashwa kulo mdlalo, wathi baziyekele bona ukuwunqoba.
“Umdlalo siwuthwale uqala kwaze kwabe uyaphela, sakha nenqwaba yamathuba sangawasebenzisa. Ngiyasola ukuthi u (Eric) Tinkler unomuthi wokusehlula ngoba nangesizini ephelile sikhishwe nguyena kulo mqhudelwano esakwiCape Town City. Sikwenze konke obekufanele sikwenze kulo mdlalo sadlala nebhola eliseqophelweni eliphezulu kodwa kwabheda kona.
“Ngiyakuqonda ukuthi abalandeli kabafune ncazelo bafuna izinkomishi nje qha kodwa ngiyathemba ukuthi nabo bazibonele ukuthi kulo mdlalo kunqabe yona inhlanhla,” kusho uKomphela ogcizelele ukuthi ngeke asule esikhundleni sakhe ngenxa yalo mphumela.
Uqhube wathi: “Kunomuntu ongitshele ukuthi akukho okonakele ngendlela esidlale ngayo kodwa kunento ethile esingayenzi kahle. Ngokwami leyo nto wukufaka ibhola enethini. Umuntu uzophila nayo le ngcindezi ngoba ngabizelwa ukuzosebenzela le kilabhu nezinkulungwane zabalandeli. Kuzolunga ekugcineni.”
Mayelana nokuhamba kukaGeorge Lebese oseyodlala kwiMamelodi Sundowns, uthe impilo yasebholeni.
Uthe isinqumo ngomgadli waseArgentina, uJonatan Philippe, uzosithatha maduzane. Uthe badinga umuntu ozobhakuzisa inethi kuphela ngoba bayakwazi ukulithunga kahle abafana bakhe.
UTinkler ocija iSuperSport, uthi konke kuhambe ngokohlelo.
“Inhloso yethu bekuwukuthi sihlale sibalinde basingenele bese sibabamba ngesikhathi besemngceleni wethu. Nangempela isu lethu lisebenzile bagaxelile sababamba. Nokho mukhulu umsebenzi osasihlalele kuzofanele sisebenze ngokuphindiwe uma sifuna ukwenza kahle ngale sizini,” kusho uTinkler.