IMBOKODO IZOCOBELELANA NGAMASU
BAZOCOBELELANA ngolwazi lokuphumelela abesifazane emcimbini iSouth African Women Business of Note, ozoba seGarden Court Hotel, eThekwini mhla zingama-23 kwephezulu.
Umhleli walo mcimbi - oba minyaka yonke - uMnu Protus Ndaleni, ongumqondisi wePNG Group, uthi kubalulekile ukuba abesifazane bafukulane futhi bagqugquzelane, ikakhulu abamnyama.
“Ngokukhuluma bebodwa, bazokwazi ukugqugquzelana ngoba kuzobe kungesibona abesifazane asebephumelele kuphela kodwa kuzocathuliswa nabasazama ukuzimela,” kusho yena.
Uthi ukuzimela kwabesifazane kumele kubekwe eqhulwini ngoba ngokomlando kabawatholanga amathuba afana nawabesilisa. "Bonke abazoba semcimbini sicela baphathe amakhadi amabhizinisi. Lokhu sikwenzela ukuba bakwazi ukuxhumana nokudayiselana amabhizinisi bebodwa. Sizotomula amakhadi amabhizinisi ayisihlanu, abanikazi bawo bathole ithuba lokusichazela ngamabhizinisi abo,” kusho uMnu Ndaleni.
Phakathi kwabesifazane abazobe beyingxenye yalo mcimbi, kubalwa uNkz Thobile Nxumalo onguMhleli oMkhulu weLANGA, uNkk Weziwe Thusi onguNgqongqoshe wezokuThuthukiswa koMphakathi KwaZulu-Natal, uNkk Lindiwe Rakharebe ongumQondisi eNkosi Albert Luthuli International Convention Centre, uNkz Kadija Patel oyisikhulu emkhakheni wezindaba, u-Amanda Ndiki ongumbhali wezincwadi nomethuli wezinkulumo ezakhayo.
Ukuthola ulwazi oluthe thuthu ungaxhumana nabahleli ku: corporate@pngroup.co.za noma ufonele kwethi: 082 297 5336.