BABULAWA YINDLALA EZIKOLENI
ZIBHUBHILE yinkemane izingane ezifunda kwezinye izikole ngaphansi esekethe yaseMbumbulu, eningizimu yeTheku ngenxa yokunikezelwa komsebenzi kumuntu okuthiwa uzihlangulile sekulindelwe ukuba asabalalise ukudla kulezi zikole.
ILANGA lithole ukuthi eFundinduku Secondary School, eMadundube Primary, eBridgeman Primary, eDuze Primary, eKudeyeni Primary naseNkanyezi Primary selokhu kuvulwe izikole kazikaze zikuthole ukudla. Kuthiwa obekumele aphekele lezi zikole uthe akanalwazi ngalo msebenzi okuthiwa makawenze, ubengasithumelanga isicelo sokusebenza ngaphansi kwalezi zikole.
Umthombo weLANGA uthi ziphazamisekile izingane zibona kudliwa kwezinye izikole kodwa zona zibulawa yindlala.
Uthi kuneziphephela kukhona lokhu kudla esezingasalubhadi esikoleni ngenxa yokuthi kakuphekwa. “Ukudla kuneqhaza elikhulu kakhulu ekusizeni izingane eziphuma emindenini ehlwempu. Kuyasixaka ukuthi lo muntu unikezwe kanjani umsebenzi ekubeni ethi akanalo ulwazi lwawo.
"Ubefonelwa usuku nosuku ecelwa ukuba alethe ukudla ngoba phela unikeziwe incwadi yokuba azosebenza ezikoleni zezingane zethu,” kusho umthombo. Abazali bakhale ngokwenzeka kulezi zikole kanti kubikwa ukuthi umnyango wezemfundo usuqoke inkampani entsha, iChube Events And Training, ukuba iphakele lezi zikole.
"Bekulindeleke ukuba iqale mhla zili-14 kuNcwaba (August) kuze kube mhla zingama-31 kuNdasa (March) ngonyaka ozayo. ILANGA lixhumanile nalezi zikole zakuqinisekisa ukuthi akukho ukudla ezikoleni. UNkz Nombuso Shezi weChube, wethembise ukuthi uzoqala umsebenzi namuhla ngoLwesine ahambise ukudla ezikoleni.
Okhulumela uNgqongqoshe wezeMfundo KwaZulu-Natal, uMnu Kwazi Mthethwa, uthi akekho onikezwa umsebenzi engathumelanga isicelo. Okwenze ezinye izikole zingakutholi ukudla, uthe bekusagqigqwa ezinkantolo abanye bengenelisekile ngokukhishwa kwale thenda.