LUCHITHE ABASAKAZI NABAHLAZIYI UKHOZI FM
LIGADLE kwezwela izembe kubahlaziyi nabasakazi bezemidlalo kuKhozi FM olungaphansi kweSouth African Broadcasting Corporation (SABC).
Izolo ngoLwesithathu kuputshuke ukuthi uKhozi FM - olubalwa neziteshi ezingenisa inzuzo eningi kwaSABC - ngeke luzivuselele izinkontileka zabasakazi nabahlaziyi bakanobhutshuzwayo, abombhoxo nabekhilikithi.
Izinkontileka zabo ziphela ekupheleni kukaNcwaba (August) kanti ezabanye zizophela ngezayo. Phakathi kwabantu abangeke besazwakala oKhozini FM nguBenedict “Tso” Vilakazi obehlaziya no-Owen “Gatsheni” Ndlovu obesakaza unobhutshuzwayo maphakathi nesonto nangezimpelasonto, ezinze eGoli.
UGatsheni ozakhele igama ngetemu elithi “Ubani ikhehla?” kwi-SoccerZone evezwa kwa-SABC 1 ngoMsombuluko ngelama-21h00, ukuqinisekile ukuthi uchithiwe oKhozini. Yize ezwakalise ukungenami ngokuhamba kwakhe, uthembise ukudalula akubize ngenkohlakalo edla lubi athi yenziwa ngabanye babaphathi baseSABC uma beqasha.
Indawo kaGatsheni kuthiwa izothathwa nguSbo Shangase obevame ukusebenza naye ehlaziya. Umthombo uthe kunezikhalo zokufakwa kukaShangase njengoba engazelwa lutho emkhakheni wezindaba.
Omunye ochithiwe nguBheka Phakathi ozakhele igama elihlikihla kwiLamontville Golden Arrows nakwi-Orlando Pirates obesehlaziye isikhathi eside kulo msakazo.
Abanye abahambayo nguBongani Yengwa obehlaziya unobhutshuzwayo, uVusi Kunene obehlaziya umbhoxo, uJabu Mbambo noVicky Masuku abebebhekene nekhilikithi noVeli Khumalo osethole amadlelo aluhlaza njengoba esakaza ngesiZulu kwaSuperSport.
Kakwaziwa ukuthi izikhala zabo zizovalwa ngobani njengoba kubikwa ukuthi iSABC intanta ezikweletini. Ukhozi FM luchitha laba nje, ibhekene ngeziqu zamehlo phakathi kwabasebenzela iSABC kumabonakude nezikhulu zale nkampani njengoba zifuna ukubachitha.
Phakathi kwabo kunoMarks Maponyane, uGloria Brown, uDavid Kekana, uTshepo Mabona noChris Bongo. Ngemuva kokuthinta abameli babo bekhala ngokuthi kabaziswanga kusenesikhathi mayelana nokuchithwa kwabo, sebenikwe izinkontileka zezinyanga ezimbili.
Okhulumela iSABC, uMnu Kaizer Kganyago, uvumile ukuthi zikhona izinkontileka ezingavuselwanga kodwa hhayi oKhozini kuphela. Uthe ngenxa yesimo semali esingesihle, iSABC iphoqelekile ukungazivuseleli izinkontileka zabanye abasakazi nabahlaziyi.
“Yize ngingeke ngiwazi amagama abantu izinkontileka zabo ezingavuselelwanga kodwa ngingakuqinisekisa ukuthi ngenxa yezinkinga ngakwezemali, siphoqeleke ukuba zingavuselelwa izinkontileka zabebesebenza beyitoho,” kusho yena.