Izizwe zabeNgoni zivuselele ubumbano
Umcimbi ubuhanjelwe yizizwe ezahlukahlukene
KUVUSELWE ubuhlobo nokudlelana kwezizwe zabeNgoni kuMthetho Cultural Festival obusesifundeni iMzimba, eMalawi kusukela ngoLwesine olwedlule kwaze kwaba yiSonto.
Lo mcimbi oba minyaka yonke, ubuhanjelwe yizizwe ezahlukahlukene ziphuma emazweni angomakhelwane beMalawi.
Izizwe ebezinezithunywa kulo mcimbi ngesakwaGumbi (Jele) ebesimelwe yiNkosi Zeblon Gumbi ebihola ithimba labantwana basendlunkulu yesizwe sayo (eNingizimu Afrika), abakwaGama abebemelwe yiNkosi Zulu Gama (Tanzania), abakwaMaseko abebemelwe yiNkosi Gomani Maseko ebusa eCentral Malawi, abakwaKhumalo abebemelwe yiNkosi Zwide Khumalo yakwaBulawayo eZimbabwe, abakwaJere abebeholwa yiNkosi Mpezeni Jere yaseZambia nezinye izizwe ezidlelana nalezi.
Zonke lezi zizwe beziyokhuleka enkosini engaphezu kwazo, iNkosi M’mberwa Jere V. Kulo mcimbi iNkosi M’mberwa V ichaze imfundo njengento ebalulekile entsheni, ikakhulukazi eyesifazane yathi bangajahi umendo ngoba unezinkinga.
“Kubalulekile ukuba sifunde siyintsha, lokhu ngikubhekise kubantu engilingana nabo nami, okungabantu abasha, ikakhulukazi abesifazane. Kuyisifiso sami ukuba sibe nabantu abafundile lapha ezweni lwakwethu nakwa- manye amazwe esiphuma ndawonye nawo,” kusho iNkosi ezingaphandle kweNingizimuAfrika.
Uhambo lwaseMalawi lunike ithemba eNkosini Gumbi lokuthi kuzogcwala izihambeli zasemazweni angaphandle emcimbini wabo, uMsimbithi ngoMfumfu (October). Lo mcimbi oba minyaka yonke, wenzelwa emalibeni esizwe sakwaGumbi eMvokweni, enyakatho-mpumalanga yeKwaZulu-Natal.
“NgoMfumfu sizobe sinomgubho wethu, ozakwethu ebesihlangene nabo eMalawi basitshele ukuthi bazobe bekhona lapha ezweni lakithi bezogubha nathi. Laba sizalwa nabo, siphuma esendeni elilodwa likaZwangendaba Jele,” kusho iNkosi Gumbi.