OWESIFAZANE UYAZAKHELA UBUHLE AZIBANGELE NESIGCWAGCWA
KUYINYANGA yabantu besifazane ngithanda sikhumbuzane ukubaluleka kokuthi bonke abesifazane bazazi ukuthi bangobani futhi badalelwani ngoba uma bengazazi ukuthi bangobani, abantu bayokwenza noma yini abafisa ukuyenza kubona. Uma owesifazane engazazi ukuthi wadalelwani, abantu bayomenzisa noma yini abayofisa ukuyenza ngaleso sikhathi.
Ukuxhashazwa kudalwa wukungazazi ukuthi ungubani, ukuxhaphaza umuntu kudalwa wukuthi kawumazi ukuthi uyini empilweni yakho. Kuyingozi ukuhlala nomuntu endlini kanti akakwazi ukubululeka kwakho. Umaxhaphazana udalwa wukuthi kasazani ukubaluleka komunye nomunye.
Sisekuyona inyanga yabesifazane, ngithanda sibheke ubuhle bowesifazane - ukuthi yini edala abe muhle futhi athandeke. Owesifazane ugazi uyazakhela futhi isigcwagcwa uyazibangela sona. Ubuhle bezinwele zowesifazane, izinkophe namashiya nezinzipho azipendile, bonke lobo buhle bungayidoba indoda kuyisondeze eduze kodwa ulimi lowesifazane - ngisho indlela akhuluma ngayo - yiyona egcina indoda endlini. Ubuhle bakho busondeza indoda eduze kodwa indlela okhuluma ngayo yiyona engadala indoda ihlale endlini. Kuyihlazo noma kuyichilo ukubona owesifazane omuhle kodwa ekhuluma kabi.
Imvula enamandla ithatha indoda emnyango iyingenise endlini kodwa umuntu wesifazane ongakwazi ukukhuluma kahle uthatha indoda endlini ayikhiphele emnyango ngolimi lwakhe. Ngiqonde ukuthi owesifazane oyibhimbi, udlula imvula enamandla. Bengifisa kangakanani ukuba bonke abesifazane abasezweni lethu bachithe isikhathi sabo ka-khulu besusa inkwethu olimini kunokuchitha isikhathi besusa inkwethu emakhanda ngoba ungcono owesifazane onenkwethu ezinweleni kunowesifazane one-nkwethu olimini. Owesifazane okwazi ukukhuluma kahle nendoda noma nezihambi nje, wenza umuzi ufudumale. Uyavakashelwa umuzi onowesifazane okwazi ukukhuluma ngesizotha. Noma indoda ingakwazi ukukhuluma kahle kodwa uma inkosikazi yayo iyimbi olimini, kakuvakasheleki kulowo muzi.
Kuyona yonke imizi namasonto, kakunandaba ukuthi indoda ilunge kangakanani kodwa iso lethu sonke lisuke libheke ukuthi ngabe umama wakhona unjani njengoba ubaba elunge kanje. Bayokutshela bonke abantu abakholwayo ukuthi iphutha elenziwa ngumfundisi liyaxoleleka kalula kodwa elenziwa ngumama umfundisi kukhuluma kuhlebe ngisho isimumgulu sesonto.
Ngiqonde ukuthi ekugcineni kosuku abantu abenza umuzi ubukeke kahle, abenza amasonto abukeke kahle, kungaba yilapho sisebenza khona, ngabesifazane abenza zonke lezo zindawo zibukeke kahle. Kwabheda indoda umuzi uyama nezingane ziqhubeke zifunde esikoleni uma nje owesifazane esalokhu emile umuzi uyama. Kwabheda owesifazane - noma indoda ingama ibe nesimilo - izindonga zakulowo muzi ziyoku- tshela ukuthi kuyaphilwa lapha ekhaya. Sengivala le ngosi, bengithanda abesifazane baqaphele ukuthi izinkinga zabo bazixoxa nobani ngoba kunemizi eyayingeke iphele ukuba izinkinga zakhona zazixoxwe nabantu abafanele.
Kunemizi eyafa ngoba abakhona babelulekwa ngamaqili namaqola. EBhayibhelini kunowesifazane ohlakaniphile owathi eshonelwe yingane wahlangana noGehazi, wabuza uGehazi ukuthi kuhamba kahle yini ekhaya lakhe lo mama.
Akamtshelanga uGehazi ukuthi kunenkinga kodwa wathi konke kuhamba kahle ngoba izinkinga kazitshelwa oGehazi. Ukuba lo mama wamtshela uGehazi ukuthi ingane yakhe ishonile, ngabe (uGehazi) wasiza wanikela ngamakhaza ukuba le ngane ifakwe kuwona. Ngisho oGehazi besiza kodwa basuke beqedela nje benza isimo sibe sikhulu kunakuqala. Sigade singabantu besifazane singatsheli oGehazi izinkinga zethu. Ngesinye isikhathi kumele sifunde ukuthi izinkinga zethu sizi- bikele uMdali kuqala singakazibikeli abantu.
Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10. Siku-110 Williams Road uma usuzofika eDalbridge Train Station.
Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA
LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034