KUVUSWA IKILABHU YEBHOLA EMNAMBITHI
KWAKHIWA inqanawe yekilabhu ezomela isifunda sasoThukela kwiSouth African Football Association (Safa) KwaZulu-Natal ABC Motsepe League.
ILANGA lithole ukuthi izikhulu ebeziphethe iDrakensburg FC noThukela FC zinqume ukuhlangana emuva kokudayisa la makilabhu. IDrakensburg ithengwe eMgungundlovu kwathi uThukela lwatha-thwa nguSenzo Sokhela ovusa iNatal United eMsinga.
Lezi zikhulu zihlela ukuthenga AmaJuba United Killers aphethwe nguGift Dlamini bese ziyiqamba eleLadysmith United.
Izingxoxo zingase ziphothulwe namuhla ngoLwesine eNewcastle.
Kuthiwa isinqumo salezi zikhulu sokuhlangana zisithathe emuva kokunxenxwa ngosomabhizinisi nosopolitiki bendawo ukucabangela intsha yasoThukela namaphethelo enekhono kunobhutshuzwayo.
Imizamo yokuthola uSimphiwe Hadebe obephethe uThukela FC noMgxala Mzolo obephethe iDrakensburg FC kayiphumelelanga njengoba izingcingo zabo bezikhala zingabanjwa. NolukaDlamini belukhala kodwa lungabanjwa.
Kuzo ezakulesi sigaba, iMagic FC ephethwe nguGeorge Dearnaley wodumo kumaZulu FC isayinise uLennox Bacela wodumo kwi-Orlando Pirates. Le kilabhu igijima kwiSafa Western Cape ABC Motsepe League.
Igcine igencwe yizembe iSgcino Cosmos kwiSafa KZN ABC Motsepe League. Le kilabhu igojelwe yicala ebilifake enkantolo iphonsela inselelo isinqumo sezembe. Isizogijima kwiSafa SAB League eThekwini ngaphansi kwegama elidala leDurban Warriors. Isizokuba ngaphansi kwesandla samaZulu FC.