OCHITHWE YI-BUCS KWI-EAGLES
ANGASE asayine ngokugcwele kwiRoyal Eagles edlala kwiNational First Division (NFD) uSiyanda Ngubo ophelelwe yinkontileka kwi-Orlando Pirates abephila ngokubolekiswa esengaphansi kwamabhuku ayo.
I-Eagles izovula isizini ngomdlalo onzima womkhaya noThongathi FC ngoMgqibelo ngo-15h00 ePrincess Magogo Stadium, KwaMashu. Amathikithi okungena kulo mdlalo abiza uR20 kanti azotholakala esangweni.
ILANGA lithole ukuthi uNgubo - ofakwe yiBucs ohlwini lwabangasadingeki ngoLwesibili ntambama - uxoxisana neEagles ukuyijoyina ngokugcwele. Lo mdlali ngesizini edlule ubebolekiswe yiBucs kuyona i-Eagles. Ibisimbolekise kule kilabhu amasizini amabili elandelana.
IProsport International ephethe izindaba zikaNgubo kayitholakalanga ngesikhathi sokuloba ukuqinisekisa lolu daba kanti kube ngesifanayo nakwi-Eagles.
Kuzo ezeNFD, uThierry Mulonzo usengumqeqeshi omusha weHighlands Park. Uzosizwa nguLes Grobler noStavro Tsichlas ocija onozinti. UTapuwa Kapini ongunozinti wale kilabhu utshele ILANGA ukuthi bafunde lukhulu emaphutheni angesizini edlule aholele ekutheni ikilabhu igencwe yizembe. Le kilabhu izokuya kulo mdlalo isigabe ngoKamohelo Mabuya obekwiEagles noPetrus Ngebo obegijima kuMthatha Bucks.
Isiyonke imidlalo yokuqala isizini yeNFD ihlelwe ngalolu hlobo:NGOMGQIBELO EMakhulong: Highlands Park vs Jomo Cosmos 15h00.
ETuks Stadium: University of Pretoria vs Mthatha Bucks 15h00.
EPuma Rugby: Witbank Spurs vs Super Eagles 15h00.
EPrincess Magogo: UThongathi FC vs Royal Eagles 15h00.
KaNyamazane: Mbombela United vs Black Leopards 15h00.
EGiyani Stadium: Tshakhuma Tsha Madzivhadila vs Cape Town All Stars 15h00. NGESONTO EMhlathuze Sports Complex: Richards Bay FC vs Real Kings United 15h00. NGOMSOMBULUKO E-Athlone: Ubuntu Cape Town vs Stellenbosch FC 15h00.