I-Arrows izobanjwa ngabaqeqeshi beMDC
Ihlabane ngonozinti ovimba nempukane
ISIHLOME ngonozinti omusha iLamontville Golden Arrows ezovula isizini ngokubhekana ne-Ajax Cape Town ngoMgqibelo ngo20h15 eCape Town Stadium, eWestern Cape.
ILANGA lithole ukuthi Abafana Bes’thende sebeqede konke noSherwin Naicker obevimba kwiJomo Cosmos. Lezi zindaba ziqinisekiswe nguGordon “Madubula” Masondo oyisikhulu esiphezulu kule kilabhu kaMato Madlala.
Uqhube ngokuthi ebhentshini lale kilabhu kuzokube kuhlezi uVusumuzi “Kanu” Vilakazi noPapi “Ginger” Zothwane abapheka isikwati sale kilabhu seMultiChoice Diski Challenge (MDC) njengoba bedonsa izigwebo zamakhadi abomvu uClinton Larsen nesekela lakhe uMandla “Mhloli” Ncikazi abalolonga isikwati esikhulu.
Laba baqeqeshi bathole la makhadi le kilabhu ishaya udaka ikhishwa yiBidvest Wits kuma- quarter-final eMTN8 sekukhahlelwa amaphenathi ekubeni ibihamba phambili ngo2-0 iziTshudeni zishoda ngomdlali.
USphelele “Stash” Ntshangase weBlack Leopards kuvela ukuthi useqede konke neKaizer Chiefs ezovula isizini ngokubhekana neBloemfontein Celtic ngeSonto ngo-15h00 eFree State Stadium.
UKhama Billiat kuqina imibiko ethi akasakufuni nhlobo ukuqhubeka nokudlala kwiMamelodi Sundowns emnqabele ukuyodlala phesheya.
Njengoba engeneme kwiDowns kuthiwa uncengwa ngumkhaya wakhe, uWillard Katsande ukujoyina iChiefs.
UThokozani Sekotlhong kulindeleke ukuba aqede konke neSundowns emuva kokuhlukana neFree State Stars.
IBaroka FC ihlabane ngabaxhasi bakaR10 million oluvela kwaTwo Mountains.
Izikhulu zePlatinum Stars zimemezele ukuthi bezisikaza ukufaka le kilabhu endalini nokho kazaze zamthola umuntu obezimisele ngokuyithenga.