Useqalile ukubalisa umqeqeshi we-Arsenal
USEQALILE ukubeka izaba u-Arsene Wenger ongumqeqeshi we-Arsenal ehlulwe yiStoke City ngo-1-0 emdlalweni wesibili we-English Premiership izolo ngeSonto ntambama.
Lo mqeqeshi ubalise ngokuncishwa amaphenathi kulo mdlalo. Uthi usekujwayele ukuncishwa amaphenathi acacile kodwa onompempe bagxuma bahlale ukuwanika izitha zabo. Lokhu uthi akazi noma kudalwa yinzondo abanayo ngaye siqu noma banenkinga nekilabhu yakhe.
“Bekumele sinikwe amaphenathi amabili kulo mdlalo kodwa wawaziba unondweba. Umgadli wethu omusha ongalibheki ipali u-Alexandre Lacazette, uvalele igoli lokulinganisa kodwa laphikwa kuthiwa ubesemhlabeni ongamfanele,” kuzikhalela lo mqeqeshi odabuka eFrance.
Uqhube ngokuthi: “Ngikubukisise kaningi lokhu ngabona ukuthi ngisho unyawo lwakhe belusendaweni efanele. Ngizoyilungisa inkinga yokuvuza kwamagoli njengoba nangeledlule sithole imbudlu kwiLeicester City yize sigcine sinqobe ngo4-3.”
Lo mqeqeshi ukhuluma ngalolu hlobo nje, kusale kancane akhonjwe indlela ngesizini edlule. Usizwe wukunqoba iFA Cup ehlula iChelsea kowamanqamu. Uthi izinto zizoshintsha njengoba ezobhekana neLiverpool ngesonto esekhona u-Alexis Sanchez waseChile obese kusabalele ukuthi angase ahlukane nale kilabhu.
UWenger ubamba uyayeka nje, zimhambela kahle izinto uJose “The Special One” Mourinho wasePortugal ololonga iManchester United enenebule iSwansea ngo-4-0 ngoMgqibelo. IMan United ivule isizini ngokubhabhadisa iWest Ham United ngo-mphumela ofanayo okuyenza iqhwakele kwi-log. NangoMgqibelo uRomelu Lukaku ongumgadli omusha wezikaMourinho ushaye igoli osekumenza abe namathathu emidlalweni emibili yePremiership.
Isiyonke imiphumela ye-English Premiership imi kanjena:- Tottenham 1, Chelsea 2; Huddersfield 1, Newcastle 0; Stoke 1, Arsenal 0; Southampton 3, West Ham 2; Bournemouth 0, Watford 2; Liverpool 1, Crystal Palace 0; Burnley 0, West Brom 1; Leicester 2, Brighton & Hove Albion 0; Swansea 0, Man Uni-ted 4.
Namuhla ngoMsombuluko kuzobhekana iManchester City ne-Everton kowe-English Premiership ngo-21h00, kanti uzokhonjiswa bukhoma kwi-SS3.