Umfundisi uwuqhekeze phakathi umndeni
Izingane sezidube ikhaya
KUSHUBE isimo kwaqhekezeka phakathi umndeni waseBergville, entshonalanga yeKwaZulu-Natal, ngenxa yomfundisi odabuka eZimbabwe oyekise amalunga awo amaphilisi okufanele awadle ngokomyalelo kadokotela, waphendula umuzi walo mndeni indlu yebandla lakhe.
UMfu Joshua Ncube webandla iDouble Impact kuthiwa uzenzela umathanda kulo mndeni - esingeke sawudalula ngenxa yezimo zezempilo zamalunga awo - okuthiwa usehlala nawo yize amanye amalunga engahambisani nalokho.
Kuvela ukuthi usehlukanise phakathi amalunga alo mndeni angahambisani nendlela asontisa ngayo njengoba engayikhokhi irenti, edla ukudla kwakhona futhi echithelwa ngisho namanzi okugeza. Kuthiwa uyekise umama wakulo muzi nendodakazi yakhona amaphilisi abawayalelwe ngudokotela wathi bazokwelashwa nguMoya Ongcwele.
Kuthiwa sekube nemihlangano yomndeni kepha kwaba nhlanga zimuka nomoya, umama wakhona esabisa ngokuzibulala uma kuxoshwa umfundisi.
Lo mfundisi kuthiwa usephenduke umnumzane kulo muzi njengoba kuthiwa uze avakashelwe nayingoduso yakhe khona.
Umthombo waleli phephandaba uthi sinzima isimo kulo muzi njengoba izingane zakhona sezikhethe ukuduba ikhaya zicasulwa wukondla uMfu Ncube.
“Sibi isimo kulo mndeni. Lo mfundisi usenesikhathi efikile lapha endaweni kodwa akahambi kahle lapho asuke khona. Phambilini ubehlala komunye umuzi lapha endaweni, uhambe khona kungasekuhle ngoba uvula isonto egcekeni.
“Ufike aphenduke inhloko yekhaya, ashaye imithetho kube sengathi kukwakhe lapho ehlala khona,” kusho umthombo.
ILANGA livakashele lo mndeni ngoLwesibili. Umfowabo omdala walona wesifazane - olande umfundisi - ongeke adalulwe ukuze kuvikeleke umndeni, uvumile ukuthi lukhona uqhekeko emndenini njengoba izingane zikadadewabo zingeneme ngokuba khona kukaMfu Ncube.
Uveze ukuthi lolu daba luke lwakhulunywa phambilini emndenini kodwa sangatholakala isixazululo njengoba udadewabo engezwa mshini ngomfundisi wakhe.
“Okuziphatha kabi kakhulu ukuthi emuva kokufika kwakhe, enye yezingane zikadadewethu ivele yagula kakhulu - kumanje isesibhedlela - kanti naphambilini ubeke wasoleka ukuthi lapho efika khona abantu bayagula,” kusho yena.
Indodakazi yalona wesifazane ebikhona ngesikhathi kufika ILANGA, ivumile ukuthi abafowabo kabasalubhadi kubo ngoba becasulwa wukuchachaza kwalo mfundisi.
Eziphendulela umama wakulo muzi, uthe kungamanga aluhlaza konke okushiwo ngomfundisi.
Uthe yizimfamona ezikhuluma kabi ngomfundisi ngoba uyabathandazela uma benezinkinga.
“Ngizohlangana nezingane zami ukuze zizongitshela kahle zonke ukuthi kazimfuni yini. Uma kuwukuthi kazimdingi lapha ekhaya, ngizomtshela ahambe bese nami ngiqoqa eyami imithwalo ngibashiye nomuzi, ngiyozihlalela kwenye indawo,” kusho yena.
Ukuphikile ukuthi lo mfundisi umyekise amaphilisi wathi uziyekele ngoba abengahambisani naye. Ukusho lokhu maqede wakhihla esikaNandi, ekhala ngokuthi uyahlukunyezwa ekubeni yena ezikhethele yena ukulandela leli bandla.
Imizamo yeLANGA yokuthola uMfu Ncube kayiphumelelanga njengoba lona wesifazane wale waphetha ukuba likhulume naye.
Leli phephandaba liphinde lazama ukumshayela ucingo, lamthumela nomlayezo kodwa wangaphendula.
UNkk Thoko Mkhwanazi-Xalu- va, ongusihlalo weCommission for the Promotion and Protection of the Rights of Cultural, Religious and Linguistic Communities, uthi okwenziwa nguMfu Mncube kakulungile ngoba kuwukuhlukumeza ukholo lwalona wesifazane ngokumthembisa ukuthi uzolapheka uma eyeka amaphilisi.
Uphinde wagxeka isenzo somfundisi sokuqhekeza umndeni ngoba amasonto amelwe wukwakha imindeni.
Uthe kunomthetho abasalinde ukuba uphasiswe ephalamende, ozosiza ukubhekana nabefundisi abalutha abantu besebenzisa inkolo.
Utshele ILANGA ukuthi lo mthetho uzogunyaza ukuba umfundisi ephucwe isitifiketi sobufundisi uma enze into efana nekaMfu Ncube - njengoba kwe- nzeka nakodokotela noma kubameli uma benze okuphambene nemithetho yemisebenzi yabo.
“Umndeni singaweluleka ngokuthi ufake isikhalo ehhovisi lethu ukuze sizombiza umfundisi azochaza ukuthi lokhu ukwenzelani. Konke kuzoba lula uma lo mthetho usuphasisiwe ephalamende,” kusho yena.