Udinwe washisa umuzi nogogo elele
Ufice intombi ineshende
KUSUKE isidumo ngoMsombuluko owesilisa (30) wakwesaKwaMthethwa, eMpangeni, enyakatho-mpumalanga yeKwaZuluNatal ebamba isinqandamathe sakhe sisocansini nelinye isoka wathukuthela wangqongqisa ngomlilo imizi emibili yakubo kwentombi kulele isalukazi sakhona esineminyaka engama-91 ubudala kwenye indlu.
ILANGA lithole ukuthi leli soka, esiligodlile igama lalo lize livele enkantolo, libambe uNkz Zandile Mthethwa (27) nesoka elisha khona kwaMthethwa lathukuthela lathe-lwa ngamanzi qede lahamba layo-funa uphethiloli lashisa imizi.
Kuthiwa isoka lenza lokhu nje, yingoba lesatshiswe yileli elisha ngokuthi lizolidubula uma like lazama ukushaya uNkz Mthethwa. Kuthiwa uNkk Qinisile Mthethwa (91) obelele endlini yakhe ngesikhathi isoka lithungela umuzi ngomlilo, usinde ngeNkosi.
Kumanje uNkk Mthethwa ufihle ikhanda ezihlontsheni zakhe ngenxa yokuthi kusele izindonga kwakhe.
Ngokuthola kwaleli phephandaba ngelinye ilunga lomndeni elicele ukuba siligodle igama lalo, isoka liphinde labuya okwesibili sekuntambama seliyoshisa omunye umuzi okuyiwona uNkk Mthethwa abesesele nawo, ezitshela ukuthi uzolala kuwona.
“Ngemuva kwale sigameko, ugogo uqulekile waphuthunyiswa emtholampilo oseduze, okuyilapho ephaphamele khona.
“Okusidina kakhulu kuyona yonke le nto, lo mzukulwana okushiswe umuzi ngenxa yakhe, akasebenzi uwumthwalo kagogo, uphila ngemali yempesheni kagogo njengoba esefake ugogo kwezinye izindleko zokuthi aqale phansi akhe umuzi,” kusho leli lunga lomndeni.
“Uhlukumezeke kakhulu ugogo ngento emehlele ngenxa yokungaziphathi kahle komzukulwana wakhe. Sibonga ukuthi uphume ephila kule ndlu njengoba leli soka liyishise ephakathi,” kusho ilunga lomndeni.
“Sifisa sengathi ugogo ubengasizakala ngokuthola indlu yo- mxhaso njengoba wayevele ewubhalisele kodwa wagcina engawutholanga. Siyacela ukuthi izikhulu zingenelele kulolu daba ugogo esaphila, kungaze kufike isikhathi sokuba ahambe emhlabeni umuzi wakhe ungalungisekanga,” kusho leli lunga.
UNkz Mthethwa ozivumele ngowakhe ukuthi ubanjwe yisoka lakhe elidala labe seliyathukuthela lashisa imizi yakubo, uthe:
"Kufike u... (emgagula) ngihleli nesoka lami elisha endlini ekhaya, sizijabulela umnyango ubungavaliwe ngabona ngaye esegulukudela.
"Wumkhuba wakhe lo wokuba azifikele ekhaya engangangazisanga, uthole into abengayilindele" kusho yena. Uthi leli soka elishise umuzi ubudlelwano babo bebungasahambi kahle ngoba esethole elisha.
Okhulumela amaphoyisa aseMpangeni, uCapt Mbongeni Mdlalose, uthe kuboshwe owesilisa ngecala lokucekela phansi impahla. Uthi umsolwa kulindeleke ukuba avele namhlanje eNkantolo yeMantshi yaseMthunzini ngecala abhekene nalo.