Zimkhalele uthisha "obulale" ababili
Umsolwa kuthiwa ubengasalawuleki esethenge isibhamu
UGXAVUNWE ngabakwasidlodlo ekilasini ngoMsombuluko uthisha osolwa ngokudubula abantu ababili eMsinga, maphakathi neKwaZulu-Natal izi- dumbu zabo ezitholakale ngoMgqibelo ekuseni zidindilizile esigodini eNqoleni khona eMsinga.
Kudutshulwe uMnu Philani Dlamini noMnu Mabutho Shelembe okubikwa ukuthi bebehambe emakhaya beya emngcwabeni ngoMgqibelo eNqoleni nje- ngoba bona bengabokudabuka eNzala, eMabomvini.
Kuthiwa badlule esitolo KwaQololespoki beyofuna okuphuzwayo, kusolakala ukuthi bahlaselwe ebusuku sebebuyela emakhaya. Izinhlamvu kubikwa ukuthi zingene ekhanda kubona bobabili.
Ngokuthola kwaleli phephandaba, kunezinsolo zokuthi lo thisha ofundisa eMbomvu Combined School, eNadi, khona eMsinga, ubenegqubu lokuthi uMnu Dlamini ugwaze isihlobo sakhe eminyakeni emithathu edlule kanti uMnu Shelembe yena kuthiwa sengathi bekucishwa ubufakazi.
Umthombo weLANGA uthi umphakathi uyaveva yintukuthelo ngenxa yalesi sigameko. Kuvela ukuthi wumphakathi wangakubo kathisha eNqoleni owenze imizamo yokuba kuboshwe umsolwa kwabikelwa induna yendawo.
“Amadoda endawo abikele induna yala kudabuka khona umsolwa - kwabizwa amaphoyisa ngoba kunovalo lokuthi ku-ngaqubuka impi yezigodi kwazise abashonile badabuka kwesinye isigodi. Indaba yokusolwa kukathisha ivele ngokuthi uxabane nomngani wakhe obebuza ukuthi uMnu Shelembe umdubuleleni ngoba phela ubeseshilo ukuthi yena ubehlose lona wakwaDlamini.
"Bahilizisene, bathembisana ukudubulana indaba yaze yafinyelela emphakathini,” kusho umthombo.
Uthi selokhu ethenge isibhamu umsolwa, ubengasalawuleki esiqhumisa noma yikanjani emphakathini. Ilunga lomndeni wakwaDlamini, uMnu Senzo Dlamini, lithi kabasazi isizathu sokubulawa kwelunga labo. “Laba bafana abashonile kabasizona izixhwanguxhwangu ngoba noma bephuzile ngeke uzwe kuthiwa sebeyakhuzwa.
"Sinayo-ke imidlinzo yokuthi lona wasekhaya ubulawelwe ukuthi eminyakeni edlule ugwaze isihlobo salo thisha ngesikhathi bexabene kodwa kasizange sishone. Kuhlalwe phansi izinduna zezigodi zombili kwaxoxwa, kwathelelwana amanzi, kwashwelezwa yakhokhwa inhlawulo abebeyifunile kulo mndeni nakuba besingaka- yiqedeli kodwa besisezinhlelweni zalokho. Sethukile uma sesizwa ukuthi sekunesigameko esifuze lesi,” kusho uMnu Dlamini.
Induna yaseNzala, uMnu Skhipho Zuma, ithi basashaqekile ngokwenzeke eMabomvini. Ithi sebethembe amaphoyisa ukuba enze okufanele. “Uma sibuka nje, laba bantu ngathi bebebanjiwe indlela abadutshulwe ngayo ngoba bashaywe endaweni eyodwa bobabili. Siyayikhuza le nto endaweni yakithi ngoba izovusa uhlevane,” kusho uMnu Zuma.
Okhulumela amaphoyisa KwaZulu-Natal, uLt Colonel Thulani Zwane, uthe izidumbu zitholakale ngehora lesi-7 ekuseni ngoMgqibelo.
Uthi isizathu sokubulawa kwabo kasikaziwa. “Icala lokubulala livulwe esiteshini samaphoyisa eMsinga kwaboshwa umsolwa oneminyaka engama-27 ubudala. Uzovela eNkantolo yeMantshi eMsinga maduze,” kusho uLt Col Zwane.