Uwole izindondo ngokusiza umphakathi
Uthi ubazi kahle ubunzima bokuthola umntwana usemncane
WUKUYA egodini kuphela athi kuyomhlukanisa nokusebenzela umphakathi uNkz Amanda Eve Mseleku (29), osanda kuwola izindondo ezine emcimbini wokuklonyeliswa kwabantu abasebenzela imiphakathi abayakhele ngokungakhathali.
UNkz Mseleku, waseMfazazane, eMthwalume, ogwini oluseningizimu yeKwaZulu-Natal, uhlomule emikhakheni emine emcimbini Ugu District Awards 2017 ezinyangeni ezimbili ezedlule. Ungomunye wabantu abasha abashiye abaningi bengawuvali umlomo ngemisebenzi eyahlukene ayenzela umphakathi waseMzumbe namaphethelo.
Le ntokazi inothando lokusebenza kakhulu nentsha ayilekelele ekubeni ilwe nezingqinamba esuke ibhekene nazo empilweni. “Kuwubizo kimi ukusebenza nentsha, ngizimisele ngokuqhubekela phambili namaphrojekthi engiwenzayo nayo. Yize izingqinamba zikhona kodwa kangizivumeli zingidikibalise ngoba lokhu engikwenzayo kangikwenzeli ukubukwa, ukunconywa noma ukubongwa.
"Kepha ngikwenza ngoba ngiyakholwa wukuthi uma sifuna ukuhlala eNingizimu eshintshile kumele thina ngabodwana kube noshintsho esilwenzayo emiphakathini esikuyona noma ngabe silubona luluncane kangakanani. Ngisho kungathiwa usiza umuntu oyedwa nje, lokho kuyoba nomthelela omkhulu,” kusho le ntokazi.
Ngesikhathi kuklonyeliswa abenze kahle, le ntokazi imuke nezindondo ezine njengomuntu osebenzela umphakathi ngokukhulu ukuzikhandla. Uhlabane kwiBest Leader of the Year 2017 ngaphansi kukaMasipala uMzumbe nakulona uGu - okuwumasipala wesifunda - wakhala wemuka neBest Leader of the Year ngaphansi kwabo bobabili labo masipala.
Akagcini nje ngokugqugquzela intsha ukuba ivuke izithathe, uphinde agcizelele nokubaluleka kwemfundo njengoba naye efundile, wenze iziqu zeRadio Production nobuntatheli eThe Institute For The Advancement of Journalism eGoli ngowezi-2010. Wenze neziqu zeHuman Resources Management eSayidi TVET College. Kuyimanje wenza unyaka wokuqala ezifundweni zobuthishela e-University of South Africa (Unisa).
Ngaphambi kokuzibandakanya nezinhlelo ezibhekelela intsha nasemabhizinisini, le ntokazi iqale yasebenza njengomsakazi esiteshini somphakathi, iRadio Sunny South yaphinde yasebenza njengophrojusa wezinhlelo. Ngonyaka odlule iqhamuke nohlelo olubizwa ngeYou’re Not Alone, Young Single Mother’s Empowerment, okuyingqungquthela ebhekelele ukusiza amantombazane athole izingane esemancane ukuba angaqhubeka kanjani nempilo.
Uyenza ngaphansi kwenhlangano yakhe, i-Eve Youth Development Organisation (EYODO). “Ngiqhamuke nohlelo olunjengalolo ngoba ngiyazi ukuthi kunjani ukuba ngumama osemncane. Kumele uthathe izinqumo ezinqala ngempilo yakho kanti kwezinye izikhathi kawesekwa kahle uma usabhekene nalesi simo.
"Mina ngithole izingane ngisemncane kodwa kangikuvumelanga lokho ukuba kungenze ngingabe ngisalandela amaphupho ami, ngivuke ngazithuntutha ngasebenza kanzima,” kusho yena.
Le nhlangano ngiyisungulele ukusebenzisana nentsha evela endaweni yangakithi ethathwa njengendawo yasemakhaya. Lapha sicijana ngezinto eziningi ezithinta impilo, yizingqinamba esibhekene nazo njengentsha sesekane ezintweni esifisa ukuzenza.
"Sinanezinhlelo zokuhambela ezikoleni ezahlukene, ikakhulukazi ezasemakhaya, siluleka futhi sigqugquzela intsha ngokuziphatha nokubaluleka kwemfundo,” kusho yena.
Uthi inhloso enkulu wukunika intsha engasebenzi amathuluzi engakwazi ukuwasebenzisa ithole imisebenzi noma ikwazi ukuzithuthukisa yona uqobo.
“E-EYODO siphinde sigqugquzele nabasebenzayo noma abafundayo ukuthi kumele bazimbandakanye ezintweni ezahlukene ukuze babe nemiqondo esabalele. Siphinde sibagqugquzele nangokuba baqale amabhizinisi benze nezinto ezibagcina bematasa, bangazitholi benesikhathi lapho bengenzi lutho khona.
"Inhloso yethu enkulu wukubuyisela ithemba lempilo nakulabo elisuke selibalahlekele," kusho yena. Le ntokazi ithi iyaqinisekisa ukuthi iyisibonelo esihle ngezenzo zayo entsheni njengoba nayo imatasa ngezinto eziningi. “Ngisemabhizinisini kanti ngiphinde ngibe nelebuli yami ebizwa ngeEyodo Collection okuyizimpahla ezithandwa kakhulu yintsha, ngingumnikazi wenkampani ehlela imicimbi.
"Ngale kokuhlela imicimbi ngaphansi kwayo le nkampani ngiphinde ngisebenze njengeSocial Media Marketer emicimbini emikhulu yobumnandi enjengoGu Jazz Festival neSouth Coact Lifestyle Experience," kusho le ntokazi.
Yize kukuningi ekwenzayo kodwa ithi uhlelo lokucija abesifazane abasebencane abangomama - ukuba bavuke bazithathe baqhubeke nempilo - luseduze kakhulu nenhliziyo yayo ngoba yinto eyenzekile kuyona. Uphinde wethula nohlelo olubizwa ngeYoung Single Fathers olulekelela abesilisa abasebancane abazithola bezikhulisela izingane ngabodwana.
“Ngihlangane nowesilisa ongithembise izulu nomhlaba, okuthe uma sengikhulelwe wavele wanyamalala ngaphandle kwesizathu. Lokho kukodwa nje, kungishiye nginengcindezi eyisimanga, ngingakwazi nokubheka abantu basekhaya emehlweni. Kangazanga ukuthi lesi simo ebengikusona ngizosichaza kanjani,” kusho yena.
Uthi ingcindezi ibe nkulu kakhulu sekufanele ayeke isikole ukuze akwazi ukunakekela ingane. “Yize leso sikhathi sibe nzima kakhulu empilweni yami kodwa ngizitshele lapho ukuthi ngizovuka ngizithathe ngisebenze kanzima.
"Kunabesifazane ababambe iqhaza elikhulu empilweni yami bengeseka, yingakho-ke ngibone kunesidingo sohlelo olunjengalolu ngoba ngiyazi ukuthi labo mama abancane babhekene naziphi izingqinamba futhi ngiyazi ukuthi bakudinga kangakanani ukwesekwa,” kusho yena.
Ngaphansi kwe-EYODO, uphinde anxuse izinkampani ezinkulu nosomabhizinisi ukuba banikelele intsha esafunda ngemisubelo ( pads) ukuze bangalovi esikoleni uma besesikhathini, ikakhulukazi labo abaphuma emakhaya aswele.