EyaseKZN isayinise umdlali waseTanzania

UMvoti FC uhlose ukunyukela kwiNFD

UHLOMA ngomdlali wokufika uMvoti FC ogijima kwiSouth African Football Association (Safa) KwaZulu-Natal ABC Motsepe League.

ILANGA lithole ukuthi le kilabhu kaBonginkosi Gwala isihlabane ngo-Anderson Mbaga odabuka eTanzania.

Lo mdlali kulindeleke ukuba aqinise isisu sale kilabhu eqeqeshwa nguBheka Phakathi othathe lo msebenzi emuva kokuba izinyawo zigcwale udaka kuDoctor Mkhonza.

UPhakathi uthi amalungiselelo esizini ezayo ahamba kahle kakhulu ezeseka ngokuthi uthole isikhathi esanele sokuhlanganisa abadlali abahle.

Nokho akafunanga ukuqinisekisa eyokuthi balwela ukunqoba lesi sigaba abalale isizini kwi- log yaso ngesizini edlule kunqoba iThongathi FC esidlala kwiNational First Division (NFD).

“Isizini izoqala kahle sesihlome ngoMbaga waseTanzania. Sikholwa wukuthi uwuhlobo esiludingayo lo mdlali kulesi sigaba yize engowokufika,” kusho uPhakathi ozakhele udumo elihlikihla kwiLamontville Golden Arrows nakwi-Orlando Pirates eminyakeni edlule.

Uqhube wathi: “Abanye abadlali esibatholile nguS’fiso Nxumalo ophuma kwiKwaMashu All Stars, uSamkelo “Villa” Khoza obekuThukela FC, uLungani Ndlovu ophuma esikhungweni sabadlali abasathuthukiswa beFree State Stars, uScebi Ndlovu noMgcina Ngema obesesikwatini seMultiChoice Diski Challenge (MDC) seArrows. Sibuye sabuyisa uBonginkosi ‘Laffor’ Nyembe,” kusho uPhakathi.

UGwala uthi ubheke ukuba ikilabhu yakhe yenze kahle kakhulu kule sizini. Uthi ngalaba badlali ukholwa wukuthi kuzofezeka inhloso yakhe yokunyusela ikila- bhu kwiNFD ukuze kugijinywe ibhola elikhokhelayo eGreytown okokuqala ngqa emlandweni wePremier Soccer League.

Le kilabhu ifuna ukunyukela kwiNFD nje, ingase ibhekane nenkinga efana neyeThongathi FC esanda kunyukela kulesi sigaba nokho engakwazi ukusebenzisa inkundla yayo njengoba ingekho esimweni sokusingatha imidlalo yePSL.