UMGADLI WASEZAMBIA UYAMANISWA NE-DOWNS
IZAMA ukuthola umgadli waseZambia iMamelodi Sundowns ukumsayinisa uma igcina ngokuhluleka ukuheha uJeremy Brockie waseNew Zealand ogijima kwiSuperSport United.
ILANGA lihabule ukuthi iSundowns izama ukusayinisa uJustin Shonga waseZambia ukuhloma ngaye uma iSuperSport igcina ngokugoloza ukudedela uBrockie obalwa nabagadli abahamba phambili kwiPremier Soccer League (PSL).
IDowns isiwuphonsile umgqakazo kwiSuperSport ukuyiheha ukudayisa uBrockie obukeka esehehekile ukujoyina omakhelwane bakhe baseTshwane.
UShonga nguyena ongcwabe iBafana Bafana ngeledlule ehlohla amagoli amabili idliwa ngo-2-0 kowokuhlungela i-African Nations Championship ekuha- mbeni.
UThulani “TT” Thuswa wezokuxhumana kwiDowns, unqabile ukuphawula ngalolu daba lwalaba badlali.
Uthi yithimba labaqeqeshi elizohlahla indlela ebheke phambili.
Mayelana noLeonardo Castro okuthiwa ugaqelwe yiKaizer Chiefs, uthe akwaziyo wukuthi ukwelakubo eColombia ukuyobhekana nezinto zomndeni wakhe. Ebuzwa ngokuqhubeka ngoKhama Billiat ogoloza ukwelula inkontileka, uthe izingxoxo basazimisile njengoba sebegxile emidlalweni ye-Absa Premiership esanda kuqala.
NgoLwesibili ebusuku le kilabhu ihlulwe yiPolokwane City ngo2-1 wamagoli kaRodney Ramagalela kwathi eleDowns lashaywa nguGeorge Lebese kuyiphenathi. UZISHAYE ngendlebe etsheni umqeqeshi we-Orlando Pirates ngesifo esidala sale kilabhu abezitshela ukuthi useselaphe ngokugcwele.
UMilutin “Micho” Sredojevic ocija iPirates uzwakalise indumalo ngamaphutha awachaze njengawubungane akhonjiswe yizitobha zakhe le kilabhu ibambana neBaroka FC ngo-1-1 kowe-Absa Premiership ngoLwesibili kusihlwa ePeter Mokaba Stadium, ePolokwane. Kulo mdlalo iBucs emuva iqale ngo-Innocent Maela, uThabo Matlaba, uNtsikelelo Nyauza noGladwin Shitolo. USredojevic uthi akeneme neze ngezitobha zakhe.
“Ocwaningweni engilwenzile ngifika eNingizimu Afrika ngithole ukuthi le kilabhu inesifo sokuvuzisa amagoli ngendlela engaqondakali, yenza namaphutha awubungane. Yinto yokuqala engifike ngazama ukuyilungisa, bese ngizitshela ukuthi sengiyelaphile sengizodlulela kokunye kanti ngiyazikhohlisa.
“Kulo mdlalo sibe namaphutha emuva engingawathandanga kangangoba negoli elishaywe yizimbangi kube wubudedengu bethu emuva, kasizange simake ngendlela. Kodwa-ke ngeke ngiphele amandla ngizoyilwa le mpi. Lesi sifo ngizoselapha noma kanjani ngiyazazi ngingungqondongqondo uma kuziwa ngasekuqiniseni udonga,” kusho uSredojevic.
UKgoloko Thobejane ocija iBaroka FC, uthi iBucs isindiswe wubuthuntu babagadli bakhe.
“IPirates isizwe yithina bekufanele siyihlule, isiwombe sesibili sonke bekungesethu sazihlulekela thina. Kodwa-ke ukushwetshwa kwamagoli kakusiyona inkinga yeBaroka nje kuphela yinkinga ekhungethe iNingizimu Afrika yonke,” kusho uThobejane ophethe ngokuthi mhlawumbe kumele alibangise kwababonayo ukulungisa isimo.